ქართული პრესის მიმოხილვა 15.11.2019

ივანიშვილის ახალი გეგმა - ვადამდელი არჩევნების აჩრდილი

"პროცესები შეიძლება არაპროგნოზირებადი სცენარით წავიდეს და ხანგრძლივი დესტაბილიზაცია მივიღოთ” - ანჯაფარიძე

***

ივანიშვილის ახალი გეგმა - ვადამდელი არჩევნების აჩრდილი

“რა სცენარისკენ მიჰყავს ქვეყანა ბიძინა ივანიშვილს და უნდა ველოდოთ თუ არა ვადამდელ საპარლამენტო არჩევნებს. ივანიშვილმა და მმართველმა გუნდა დაპირება არ შეასრულა და პარლამენტში პროპორციული საარჩევნო სისტემის კანონპროექტი ჩააგდო. რატომ გადაიფიქრა ივანიშვილმა დანაპირების შესრულება და რა არის ახლა მისი სამოქმედო გეგმა. "აჯანყებული" მაჟორიტარები, თუ კარგად დაგეგმილი სცენარი, სადაც ყველას თავისი როლი აქვს. შესაძლოა უმრავლესობა და „ქართული ოცნება" საერთოდ დაიშალოს. არც ის არის გამორიცხული, რომ ქვეყანაში მასობრივი საპროტესტო აქციები დაიწყოს”, - წერს გაზეთი "რეზონანსი“ სტატიაში სათაურით, ივანიშვილის ახალი გეგმა - ვადამდელი არჩევნების აჩრდილი

"ანალიტიკოსები „რეზონანსთან" ამბობენ, რომ ახლა ივანიშვილს რევოლუციური სცენარის გარდა ყველა სხვა სცენარი აწყობს და მისთვის სრულიად ხელსაყრელია. პარლამენტში მესამე ცდაზე 142 კაცინი ქვორუმის მიუხედავად 104 ადამიანმა მიიღო კენჭისყრაში მონაწილეობა. 101-მა დეპუტატმა კანონპროექტს ხმა დაუჭირა, ხოლო 3-მა მათგანი წინააღმდეგი წავიდა. კენჭისყრაში მონაწილეობისგან პარლამენტში მჯდომმა 38 დეპუტატმა თავი შეიკავა. პროპორციულ საარჩევნო სისტემაზე გადასვლის კანონპროექტის მისაღებად, რომელიც პარლამენტმა ჩააგდო, 113 ხმა იყო საჭირო. ყველა დეპუტატი, რომელმაც კანონპროექტს მხარი არ დაუჭირა, ან კენჭისყრაში მონაწილეობისგან თავი შეიკავა, "ქართული ოცნების" წევრია. ამის შემდეგ კი მედიასთან 8 „ოცნების" დეპუტატმა გუნდის დატოვების შესახებ განცხადება გააკეთა. არ არის გამორიცხული, რომ უმრავლესობა კიდევ სხვა დეპუტატებმაც დატოვონ. ამ ეტაპზე კი უმრავლესობის რიგები, თამარ ჩუგოშვილმა, ირინა ფრუიძემ, თამარ ხულორდავამ, დიმიტრი ცქიტიშვილმა და 4-მა სხვა დეპუტატმა დატოვა”, - აღნიშნავს გამოცემა.

"სამწუხაროდ, შედეგი დადგა და არ აქვს მნიშვნელობა რამ გამოიწვია ეს. შედეგი დადგა ესეთი, რომ საკონსტიტუციო ცვლილებები ჩავარდა. ჩვენთვის არის ძალიან სამწუხარო ეს და სამწუხაროდ, ჩვენ არ გვრჩება სხვა გზა, გარდა იმისა, რომ დავტოვოთ, როგორც საპარლამენტო თანამდებობები, ასევე საპარლამენტო უმრავლესობა, ვინაიდან საკონსტიტუციო ცვლილებებს და პროპორციული საარჩევნო სისტემის ჩავარდნის საკითხი არის ძალიან მძიმე საკითხი, რომელზეც მე პირადად და ჩემი კოლეგები პასუხისმგებლობას ვერ ავიღებთ" - ამბობს თამარ ჩუგოშვილი. "ევროპული საქართველოს" წევრი გიგი წერეთელი დეპუტატების გადაწყვეტილებას, უმრავლესობის რიგების დატოვების შესახებ, მიესალმება. წერეთელი არ გამორიცხავს, რომ ვადამდელი არჩევნების ჩატარების საკითხი დადგეს, თუმცა, მისი თქმით, საზოგადოება არჩევნების ისევ მაჟორიტარული წესით ჩატარებას არ დაუშვებს. "ისედაც ჩვენს უკიდურესად მძიმე მდგომარეობაში მყოფ მოსახლეობას, ეს არეულ-დარეულობა ნამდვილად არ სჭირდება, არ სჭირდება პარლამენტს ასეთი პრობლემები, სადაც გადაწყვეტილებებს ვერ იღებენ, სადაც ერთმანეთს ლანძღავენ. დღეს არის კრიზისი, ერთმა ჯგუფმა დატოვა, სწორი გადაწყვეტილება მიიღეს ალბათ, იმიტომ რომ მორალურად ძნელად შესაგუებელია ეს. "მეორე ჯგუფი ცალკეა - მაჟორიტარების. გადაწყვეტილებების მიღება ვერ მოხდება და ბუნებრივად შეიძლება დადგეს ვადამდელი არჩევნების თემა. შეიძლება აწყობდეს დღეს "ოცნებას" მაჟორიტარული წესით, მაგრამ მე არ ვფიქრობ, რომ საზოგადოება ამას დაუშვებს, რომ ისევ წყნარად ჩატარდეს ეს არჩევნები მაჟორიტარული წესით, ისევ მოსყიდვით და ადმინისტრაციული რესურსით მოიგონ ადგილები რეგიონებში," - განაცხადა გიგი წერეთელმა”, - განაგრძობს გამოცემა.

"პროპორციული საარჩევნო სისტემის კანონპროექტის ჩაგდების შემდეგ საკანონმდებლო ორგანოსთან საპროტესტო აქცია ახალი ძალებით განახლდა. აქციის ორგანიზატორების განცხადებით, ხელისუფლებას ლეგიტიმაცია არ აქვს და ივანიშვილის ხელისუფლებიდან ჩამოსაშორებლად ყველა პოლიტიკური ძალა თუ საზოგადოებრივი მოძრაობა უნდა გაერთიანდეს. "მიიღეს შედეგები, რომლის მიხედვითაც 2020 წელს ესენი ვერ დარჩებიან ხელისუფლებაში და თქვეს, ჩვენ არ გვაინტერესებს ხალხის ნება, არ გვაინტერესებს რას ფიქრობს საზოგადოება, ჩვენ ძალაუფლებას ვაყრდნობთ ძალოვან სტრუქტურებზე და ამიტომაც მოხდა საკვანძო თანამდებობებზე ძალოვანი მინისტრების დომინირება, მისი მცველების და საფერფლიდან ამოღებული ბიჩოკების. "სახეზეა სახელმწიფოს მიტაცება, შესაბამისად პროპორციული ჩააგდეს, აღარ აქვთ იმედი, რომ უმრავლესობა მათ მხარს დაუჭერს, ეს აჩვენებს, რომ მათ ლეგიტიმაცია აღარ აქვთ. აუცილებელია ბიძინა ივანიშვილი, ეს პლუტოკრატი ჩამოშორდეს ხელისუფლებას და საქართველოს პოლიტიკას. 1948 წელს მიღებულ ადამიანთა უფლებების საყოველთაო კონვენცია ამბობს, თუკი ხელისუფლება გადაიზარდა ტირანიაში, მაშინ ხალხს აქვს აჯანყების უფლება. ჩვენ ვუყურებთ სამივე ხელისუფლების მიტაცებას - სასამართლო, საკანონმდებლო, აღმასრულებელი,"- განაცხადა შოთა დიღმელაშვილმა. მისივე თქმით, მაჟორიტარების "ურჩობა" ბიძინა ივანიშვილის გეგმის ნაწილი იყო, რისი საბოლოო მიზანიც პროპორციული საარჩევნო სისტემის კანონპროექტის ჩაგდება იყო. დიღმელაშვილის თქმით, მოძრაობა "სირცხვილია" ივანიშვილის ხელისუფლებიდან ჩამოსაშორებლად ყველას თანამშრომლობას სთავაზობს”, - დასძენს გამოცემა.

"ანალიტიკოსი ვახტან ძაბირაძე „რეზონანსთან" არ გამორიცხავს, რომ ბიძინა ივანიშვილმა ვადამდელი არჩევნების ჩატარების გადაწყვეტილება მიიღო და სწორედ ამ გეგმით ხელისუფლებაში ყოფნის ვადის გახანგრძლივებას ცდილობს. თუმცა, მისთვის გაუგებარია რატომ არის ის დარწუნებული, რომ 2020 წელს თუნდაც შერეული საარჩევნო სისტემით არჩევნებს მოიგებს. ანალიტიკოსი ამბობს, რომ სრულიად დაუჯერებელია ასე მოულოდნელად აჯანყდნენ მაჟორიტარი დეპუტატები, რომლებსაც წლების განმავლობაში ხმა არ ამოუღიათ. მისი აზრით, ძალიან მცდარი გათვლაა, თუ კი ივანიშვილს იმის იმედია ქვს, რომ ხალხი ამას არ გააპროტესტებს. თუმცა, ისთვის ახლა ყველა სცენარი მისაღებია, გარდა რევოლუციურისა, რაც საქართველოს მოსახლეობასაც არ აწყობს. „სიმართლე გითხრათ პირველივე მოსმენაზე ამ კანონპროექტის ჩაგდებას არ ველოდი. სავარაუდოდ, როგორც ჩანს ივანიშვილმა არჩვენების პროპორციულ სისტემაზე ჩატარება გადაიფიქრა და ამის მიზეზი შიდა კვლევებიც შეიძლება იყოს. აქ ორ ვერსიაზე შეიძლება ვისაუბროთ. მან ამ გადაწყვეტილებით ჯერ ერთი, გუნდის შიგნით წმენდა დაიწყო და მეორე მას ვადამდელი საპარლამენტო არჩევნების ჩატარება უნდა. "ამ კრიზისის ფონზე თუ კი მასშტაბური აქციები დაიწყება, ის გამოვა და იტყვის, რომ კრიზისია მმართველ პარტიაში და ქვეყანაში, ამიტომაც აი ვადამდელ არჩევნებს ვნიშნავ და თავად გადაწყვიტეთ. რა თქმა უნდა, ვადამდელი არჩევნებისთვის ოპოზიცია მზად არ არის, გარდა „ნაციონალური მოძრაობისა", ამიტომაც ყველა მის გარშემო გაერთიანდება. ხოლო 3%-იანი ბარიერის პირობებში „ოცნებას" რისი იმედი აქვს და რატომ გონია რომ ამ შემთხვევაშიც უმრავლესობით მოვა, ჩემთვის გაუგებარია",-აცხადებს ძაბირაძე „რეზონანსთან", - წერს გამოცემა.

"ანალიტიკოსი კორნელი კაკაჩია, ასევე „რეზონანსთან" აცხადებს, რომ რთულია ახლა ამ გადაწყვეტილების შემდეგ გავიგოთ რა ჩაიფიქრა ბიძინა ივანიშვილმა. ანალიტიკოსი ამბობს, რომ ფაქტი ერთია, მას საარჩევნო სისტემის პროპორციულზე გადასვლა არაფრით აწყობდა და ქვეყანაში სიტუაციის გამწვავებაზეც კი თანახმაა. კაკაჩია ამბობს, რომ ახლა ივანიშვილი ვადამდელ არჩევნებს დანიშნავს და საპრეზიდენტო არჩევნების მსგავს სცენარს გაითამაშებს. კაკაჩია მოვლენების ასე განვითარებაში ასევე, საერთაშორისო ორგანიზაციებს ადანაშაულებს, რადგანაც ფიქრობს, რომ საპრეზიდენტო არჩევნების დროს, მათ საკმარისი პრინციპულობა და სიმწვავე არ გამოიჩინეს. „ერთადერთი რაც შეიძლება ითქვას, ახლა ივანიშვილს მოვლენების ყველანაირი განვითარება აწყობს. რიგგარეშე არჩევნებისთვის „ოცნების" გარდა სხვა პარტიები მზად არ არიან. რევოლუციური სცენარი ივანიშვილმა კარგად იცის, რომ ქვეყანას და ხალხს არ აწყობს, ამიტომაც შეიძლება დარწმუნებულია, რომ ეს არ მოხდება. "სხვაგვარად ყველაფერი მის წისქვილზე წყალს ასხამს. მას შეუძლია, თუ ქვეყანაში სიტუაცია დაიძაბა ვადამდელი საპარალმენტო არჩევნები დანიშნოს. როგორც ჩანს მისი გეგმაც ეს არის. საზოგადოებას ახლა ვერავინ დაარწმუნებს, რომ ივანიშვილმა ამ ე.წ. დემოკრატიულად მოაზროვნე დეპუტატებს ვერაფერი დაუმტკიცა და ვერ გადაიბირა. "ფაქტია, რომ მათ საკუთარი ინტერესებიც აქვთ, თუმცა პარტიის შიგნით აჯანყება მოაწყონ, ეს დაუჯერებელია. შესაძლოა მისი გათვლა ის არის, რომ ზაფხულში გამართული აქციების შემდეგ, ხალხი დაიღალა და ახლა საარჩევნო სისტემის შეცვლა არ შეცვლის გამო ქუჩაში კიდევ ვინმე გამოვა. "ივანიშვილი ძალიან რისკავს, რადგანაც როდესაც ზაფხულში კრიზისი შეიქმნა, ძლივს გადარჩნენ. მან მცდარი მესიჯი გამოიტანა და ახლა ჰგონია, რომ პროცესების მართვას კვლავ შეძლებს. ეს არის საკმაოდ სახიფათო თამაში, რომელიც საზოგადოების და პოლიტიკური სპექტრის კიდევ უფრო პოლარიზებას გამოიწვევს", - აცხადებს კაკაჩია „რეზონანსთან", - წერს სტატიის ავტორი.

"პროცესები შეიძლება არაპროგნოზირებადი სცენარით წავიდეს და ხანგრძლივი დესტაბილიზაცია მივიღოთ” - ანჯაფარიძე

"დღეს უკვე რამდენიმე დეპუტატმა დატოვა უმრავლესობა; როგორც ჩანს, პარტიაში ღირებულებათა კონფლიქტი გაჩნდა. არ ველოდები, რომ ბევრი დატოვებს უმრავლესობას, მაგრამ რამდენიმე დეპუტატმა შეიძლება კიდევ დატოვოს და არსებობს საფრთხე იმისა, რომ „ქართულმა ოცნებამ" პარლამენტში უმრავლესობა დაკარგოს და მთავრობის ხელახლა დამტკიცების საკითხი დადგეს," - აცხადებს „რეზონანსთან" ანალიტიკოსი ზაალ ანჯაფარიძე პარლამენტის მიერ პროპორციულ საარჩევნო სისტემაზე გადასვლის კანონპროექტის ჩაგდების შესახებ საუბრისას”, - წერს გაზეთი „რეზონანსი“ სტატიაში სათაურით, „პროცესები შეიძლება არაპროგნოზირებადი სცენარით წავიდეს და ხანგრძლივი დესტაბილიზაცია მივიღოთ” - ანჯაფარიძე

„პარლამენტმა პროპორციულ საარჩევნო სისტემის კანონპროექტს მხარი არ დაუჭირა და „ქართული ოცნების" მიერ ინიცირებული კანონპროექტი ჩავარდა. კანონპროექტის მომხრე 101 დეპუტატი იყო, კანონპროექტის მისაღებად კი 113 ხმა იყო საჭირო, რაც ნიშნავს იმას, რომ 2020 წლის არჩევნები ჩატარდება მაჟორიტარულ-პროპორციული სისტემით და 3-პროცენტიანი ბარიერით. შედეგად, საპარლამენტო უმრავლესობა დეპუტატების გარკვეულმა ნაწილმა დატოვა. ამ სიაში არიან თამარ ჩუგოშვილი, ირინა ფრუიძე, გიორგი მოსიძე, დიმიტრი ცქიტიშვილი, ზაზა ხუციშილი. თამარ ხულორდავა და სოფიო ქაცარავა.ზაალ ანჯაფარიძის თქმით, თუ მას (ქართულ ოცნებას) პარლამენტში უმრავლესობა აღარ ეყოლება, ის მთავრობის წარდგენის უფლებასაც კარგავს. როგორც ჩანს, ღირებულებათა კონფლიქტი იმაზე ღრმა აღმოჩნდა, ვიდრე ერთი შეხედვით ჩანდა”, - აღნიშნავს გამოცემა.

"მისი თქმით, აქციები დაწყებულია, მაგრამ ჯერჯერობით მასშტაბური ხასიათი არ აქვს, რადგან აქციების მთავარი მონაწილეები, ახალგაზრდული დაჯგუფებები, რომლებიც 20 ივნისის ღამის ორგანიზატორები იყვნენ, დღეს საზოგადოებაში იმ დამოკიდებულებით არ სარგებლობენ, როგორც მაშინ. ისინი გამოჩნდნენ „ნაცმოძრაობასთან" და მის განშტოებებთან აფილირებული ძალა. რთულია თქმა მარტო რამდენად შეძლებენ კრიტიკული მასის გამოყვანას ქუჩებში იმისათვის, რომ ამან გარკვეული ზემოქმედება იქონიოს პარლამენტზე, ხელისუფლებაზე და ამ საკითხის მიმართ, პოლიტიკურ მიდგომებში ცვლილებები გამოიწვიოს. აქციების მასშტაბურობა დამოკიდებულები იქნება იმაზე, რამდენად მშვიდობიანი იქნება აქციები, რომ არ მივიღოთ ისევ 20-21 ივნისის მოვლენები. თუ მსგავსი რამ მოხდა, ქვეყანაში პროცესები შეიძლება უკვე არაპროგონოზირებადი სცენარით წავიდეს და ხანგრძლივი დესტაბილიზაციის ფაზაში შევიდეთ. ის მდგომარეობა, რაც ახლა შეიქმნა, განსხვავებული მიმართულების პოლიტიკურ ძალებს ერთი დროშის ქვეშ დააყენებს. ალბათობა იმისა, რომ მათ პროცესებზე ზეგავლენის მოხდენა შეძლონ, ამ ეტაპზე 50%-50%-ზეა. სავარაუდოდ, ამ ახალგაზრდებს საკუთარ რესურსებს ოპოზიცია მიაშველებს და ქუჩაში გარკვეული მასშტაბის აქციებს მივიღებთ, მაგრამ, რამდენად იქნება ეს საკმარისი იმისთვის რომ, ის ცვლილებები გამოიწვიოს, რაც სურთ, ქვეყანაში პროპორციული არჩევნები ჩატარდეს, რთულია თქმა”, - აღნიშნავს გამოცემა.

"მისი თქმით, ქვეყანაში განვითარებულ პროცესს თავისი სიღრმისეული მიზეზები აქვს. მაჟორიტარ დეპუტატთა პოზიციებში ეს ცვლილება გუშინ და დღეს არ მომხდარა. როგორც ჩანს, ამას აქვს თავისი მიზეზები; ალბათ „ქართულ ოცნებაში" მიხვდნენ, რომ ნულოვანი ბარიერით პროპორციული არჩევნების ჩატარება, რომელიც გადაწყვეტილების გამოცხადების დროს თითქოს ისე ჩანდა, რომ მათ წისქვილზე ასხამდა წყალს, ანალიზის პროცესში მივიდნენ იმ დასვნამდე, რომ ამ სისტემით არჩევნების ჩატარება მომგებიანი არ იქნებოდა. როგორც ჩანს, „ქართულ ოცნებაში" აზრთა გაცვლა-გამოცვლა მიდიოდა, თუ რა სცენარით შეიძლება წასულიყო პროცესები ნულოვანი ბარიერის მქონე პროპორციული არჩევნების შემთხვევაში და ალბათ მივიდნენ იმ დასკვნამდე, რომ ეს სცენარი მათთვის არ იქნებოდა სასურველი. შეიძლება 20 ივნისს იმიტომ დაეთანხმნენ, რომ ქუჩის საპროტესტო აქციები ჩაეხშოთ”, - დასძენს გამოცემა.

"კორესპოდენტის კითხვაზე, რამდენად მოსალოდნელია დღეს პარლამენტის დათხოვნა ან ვადამდელი არჩევნების ჩატარება, ანჯაფარიძის თქმით, „ასეთ სცენარს არ გამოვრიცხავ, მაგრამ ამისთვის უნდა არსებობდეს კონსტიტუციური წინაპირობები; მაგალითად ბიჯეტის სამჯერ არდამატკიცება. ასევე თუ „ქართულმა ოცნებამ" ის უბრალო უმრავლესობა დაკარგა, რომელიც ახლა აქვს. ამ შემთხვევაში მთავრობის ხელახლა დამტკიცების აუცილებლობა წარმოიშვება და შეიძლება მთავრობა არ დაამტკიცონ. კონსტიტუციური მექანიზმიები შეიძლება იქნას გამოყენებული, მაგრამ რამდენად შედის ეს „ქართული ოცნების" ინტერესებში, ეს არის მთავარი. დღევანდელი მოცემულობით, „ოცნებას" შეუძლია ვადამდელი არჩევნების მოგება, მაგრამ რა უპირატესობით მოიგებს, ეს საკითხავია”, - წერს სტატიის ავტორი.

თამარ ჩუგოშვილი - მე მგონი, ადამიანი არ დადის, ვისაც სჯერა, რომ უცებ მოხდა ამბოხი უმრავლესობაში - თვალში ნაცარი არავის უნდა შევაყაროთ
ქართული პრესის მიმოხილვა 14.12.2019
ვახტანგ ძაბირაძე  -  თუ სახელმწიფოს მართვის სისტემის შეცვლა გინდა, იმ გზას კი არ უნდა გადიოდე, რომელიც შენმა წინამორბედმა გაიარა
კომპანია „ფრეგოს“ მთავარი ინვესტორი განცხადებას ავრცელებს
„კავკასუს როუდ პროჯექტმა“ ბიზნეს პროცესების ავტომატიზაცია BDO-სთან პარტნიორობით განახორციელა
"Sarajishvili 2020" - უნიკალური გემოსა და დიზაინის მქონე სასმელი ამაღლებული საახალწლო განწყობისთვის
საფეხბურთო კლუბი „სამტრედია“ უმაღლეს ლიგაში გადავიდა