გურამ მაჭარაშვილს „გაბედეს“ წევრებმა პრესკონფერენციის ჩატარების საშუალება არ მისცეს, მაჟორიტარი დეპუტატი პრესკლუბიდან პოლიციის დახმარებით გაიყვანეს
მაჟორიტარ დეპუტატ გურამ მაჭარაშვილს სამოქალაქო მოძრაობა „გაბედეს“ წევრებმა პრესკონფერენციის ჩატარების საშუალება არ მისცეს.
რამდენიმე ახალგაზრდა „მთავარის“ პრესკლუბში მაშინ მივიდა, როდესაც მაჭარაშვილი ჟურნალისტების კითხვებს პასუხობდა.
ახალგაზრდებმა დეპუტატს სასტვენებითა და ხმამაღალი შეძახილებით შენობა დაატოვებინეს. მაჭარაშვილის გაყვანა პრესკლუბიდან საპატრულო პოლიციამ უზრუნველყო.
„გურამ მაჭარაშვილი ორმოცთაგან ერთ-ერთი დეპუტატია, რომელმაც ჩააგდო პროპორციული საარჩევნო სისტემა, მან ხელი შეუშალა ჩვენი ქვეყნის განვითარებას და უკეთესს მომავალს. ჩვენ ვეცდებით, რომ მათი ხმა არ გავაგონოთ ქართულ საზოგადოებას ისევე როგორც მათ არ ესმით ხალხის ხმა“ - განაცხადა აქციის ერთ-ერთმა მონაწილემ.
„გაბედეს“ აქტივისტები აცხადებენ, რომ პროტესტის ამ ფორმას ყველა იმ დეპუტატის წინააღმდეგ გამოიყენებენ, რომლებმაც მხარი არ დაუჭირეს პროპორციულ საარჩევნო სისტემაზე გადასვლას.
