ეს პიკეტირებები მუდმივად გაგრძელდება და მუდმივად შევუქმნით დისკომფორტს „ქართული ოცნების" იმ დეპუტატებს, რომლებიც ქვეყნის საწინააღმდეგო გადაწყვეტილებებს იღებენ, - ამის შესახებ „ინტერპრესნიუსს" „ერთიანი ნაციონალური მოძრაობის" ერთ-ერთმა ლიდერმა, ზაალ უდუმაშვილმა განუცხადა.

როგორც უდუმაშვილი აცხადებს, აქციის მონაწილეებს, რომლებიც ჩიტაძის ქუჩიდან აპირებდნენ პარლამენტის მისასვლელის ჩაკეტვას, სამართალდამცავებმა თავად ჩაუკეტეს გზა.

„ჩვენი გეგმა იყო, კვლავ მივსულიყავით პარლამენტთან და პარლამენტის შენობის პიკეტირება გაგვეგრძელებინა. თუმცა, როგორც ხედავთ, ხელისუფლებამ მთაწმინდა პრაქტიკულად პარალიზებული გახადა, გადაკეტა ყველა მისასვლელი პარლამენტთან და არა მხოლოდ პარლამენტთან მისასვლელი გზა. ხალხი ალბათ, ვერც სამსახურში წავა, რადგან ყველა ქუჩა გადაკეტილია და ტრანსპორტი პრაქტიკულად ვერსად მოძრაობს. ის, რაც თბილისის ცენტრალურ უბანში ხდება, მთლიანად ხელისუფლების პასუხისმგებლობაა. რამდენიმე ათეული თუ ასეული ადამიანის პარლამენტთან შეკრება არავის შეუქმნიდა დისკომფორტს, გარდა „ქართული ოცნების" დეპუტატებისა.

არაუშავს, დღეს ჩაკეტავენ, ხვალაც მივალთ. დღესაც შევეცდებით პარლამენტთან მივიდეთ. ეს პიკეტირებები მუდმივად გაგრძელდება და მუდმივად შევუქმნით დისკომფორტს „ქართული ოცნების" იმ დეპუტატებს, რომლებიც ქვეყნის საწინააღმდეგო გადაწყვეტილებებს იღებენ", - განაცხადა უდუმაშვილმა.