როცა წინა რეჟიმის „შავი საქმის“ შემსრულებელს ჯილდოდ აძლევ ასეთ მაღალანაზღაურებად სამსახურს, ეს არის მმართველი პარტიის მორალური დეგრადაციის გამოხატულება, - ასე ეხმიანება დამოუკიდებელი დეპუტატი ეკა ბესელია ვანო ზარდიაშვილის „ენერგოტრანსში” დირექტორის მოადგილედ დანიშვნას.
ეკა ბესელია ამბობს, რომ მმართველი პარტია „სწორედ ასეთი ადამიანების მძევალი გახდა."
„ეს არის ტრაგიკული მაგალითი, მმართველი პარტიის დღევანდელი სახე როგორია. როცა ასეთ მნიშვნელოვან პოზიციაზე და მნიშვნელოვან როლში, როგორიც არის საქართველოს პარლამენტის წევრი, შემოგყავს ადამიანი, რომელიც ერთ-ერთი ყველაზე მეტი ცუდი, შავი და უღირსი საქმის შემსრულებელი იყო წინა რეჟიმის დროს და შემდეგ უკვე, როცა მისი პარლამენტში დატოვება გახდა შეუძლებელი ცნობილი მოვლენების შედეგად, ჯილდოდ აძლევ ასეთ მაღალანაზღაურებად სამსახურს, ეს არის მორალური დეგრადაციის გამოხატულება მმართველი პარტიის. ასეთი ადამიანების მძევალი გახდა მმართველი პარტია, იმ ადამიანების, რომლებიც ყველაფერ ნეგატიურს განასახიერებენ,"- განაცხადა ეკა ბესელიამ.