ვარკეთილში "ანას ბაღთან" აქცია დასრულდა. ადგილობრივი მცხოვრებლები და აქციის მონაწილეები "ანას ბაღის" ტერიტორიაზე კორპუსის მშენებლობას აპროტესტებენ. დღის განმავლობაში აქციაზე სამართალდამცავები, ადგილობრივი მცხოვრებლები და კომპანია "გისსონის" თანამშრომლები ერთმანეთს რამდენჯერმე დაუპირისპირდნენ. სამართალდამცავებმა კი აქციის 10 მონაწილე დააკავეს.

როგორც სამშენებლო კომპანიის წარმომადგენელმა ჟურნალისტებს განუცხადა, კომპანია სამუშაოებს ადგილზე ხვალ დილიდან განაახლებს.

რაც შეეხება ადგილობრივი მცხოვრებლების პოზიციას, მათი განმარტებით, ისინი "ანას ბაღის" მიმდებარე ტერიტორიაზე დღეს კიდევ ერთ ღამეს გაათენებენ და იქამდე არ დაიშლებიან, ვიდრე მათი მოთხოვნა არ დაკმაყოფილდება და სამშენებლო სამუშაოები არ შეჩერდება.

ისინი დედაქალაქის მერს კახი კალაძეს მოუწოდებენ, რომ "ანას ბაღი" ხალხს დაუბრუნდეს.