"გამარჯვებული საქართველოს" ლიდერები ოფიციალური ვიზიტით ბრიუსელში გაემგზავრნენ
"გამარჯვებული საქართველოს’’ ლიდერები - პარტიის გენერალური მდივანი კოტე კემულარია და საგარეო ურთიერთობათა მდივანი ანა რეხვიაშვილი ვიზიტით ბრიუსელში გაემგზავრნენ. ამის შესახებ „ინტერპრესნიუსს“ პარტია “გამარჯვებული საქართველოს’’ პრესსამსახურიდან აცნობეს.
მათივე ცნობით, ვიზიტის ფარგებლებში დაგეგმილია შეხვედრები ევროკავშირის საერთაშორისო ქმედებათა სამსახურში EEAS, ევროკომისიაში, ევროპარლამენტში, ევროპის პოლიტიკის ცენტრში და სხვ.
„არ დაგიმალავთ და ჩვენმა მოსალოდნელმა ვიზიტმა დიდი ინტერესი გამოიწვია ბრიუსელში. შეხვედრების კალენდარი და გრაფიკი უაღრესად დატვირთული და მრავალმხრივია. ბრიუსელში ჩვენ ჩავდივართ უაღრესად პრინციპული პოზიციით და მკაფიო გზავნილებით. იცით ალბათ, რომ უახლოეს დღეებში ევროპარლამენტში და ევროკომისიაში იგეგმება ყოველწლიური ანგარიში ასოცირების ხელშეკრულების შესრულების შესახებ და ცხადია, ასეთ დროს კიდევ უფრო მნიშვნელოვანი და აქტუალურია, ჩვენი, როგორც ოპოზიციური პარტიის ლიდერების ბრიუსელში ვიზიტი და საქართველოში მიმდინარე რეალური პოლიტიკური პროცესების შესახებ გზავნილების გაკეთება“, - განაცხადა პარტია „გამარჯვებული საქართველოს“ დამფუძნებელმა და ერთ-ერთმა ლიდერმა ანა რეხვიაშვილმა ბრიუსელში გამგზავრების წინ.
ცნობისთვის, „გამარჯვებული საქართველოს’’ ლიდერების ვიზიტი ბრიუსელში, 25 იანვრამდე გაგრძელდება.
v-if="article.gallery" v-html="article.gallery"
