სალომე სამადაშვილი - დარწმუნებული ვარ, მაჩალიკაშვილის ოჯახი ღრმად შეურცხყოფილია იმ დასკვნით, რაც პროკურატურამ დადო

დარწმუნებული ვარ, მაჩალიკაშვილის ოჯახი ღრმად შეურცხყოფილია იმ დასკვნით, რაც პროკურატურამ დადო, - ამის შესახებ „ნაციონალური მოძრაობის" წევრმა სალომე სამადაშვილმა ჟურნალისტებს განუცხადა, რითაც გამოეხმაურა პროკურატურის მიერ თემირლან მაჩალიკაშვილის საქმეზე გამოძიების შეწყვეტას. სამადაშვილის თქმით, გამოძიების დახურვა ამ საქმის გარშემო არსებულ კრიზისს გაამწვავებს.

„ხელისუფლება ცდილობს, რაც შეიძლება სწრაფად დახუროს საქმე, მაგრამ ვფიქრობ, ამაზე საზოგადოებას ექნება ძალიან მწვავე რეაქცია. საზოგადოებამ თავიდანვე უნდობლობა გამოუცხადა საგამოძიებო პროცესს, რომელსაც წარმართავს ხელისუფლება. სწორედ ამიტომ და ასევე, მაჩალიკაშვილის ოჯახის თხოვნით, ჩვენ წარვადგინეთ ინიციატივა საგამოძიებო კომისიის შექმნასთან დაკავშირებით. გამოძიების დახურვა, რომელსაც ისედაც არანაირი ნდობა არ ჰქონდა და ის დასკვნა, რაც ვნახეთ, მხოლოდ გაამწვავებს ამ კრიზისს. დარწმუნებული ვარ, მაჩალიკაშვილის ოჯახი ღრმად შეურცხყოფილია იმ დასკვნით, რაც პროკურატურამ დადო,"- განაცხადა სამადაშვილმა.

უწყების განმარტებით, „სრულყოფილი და ყოველმხრივი გამოძიების შედეგად დადასტურდა, რომ სპეციალური ოპერაციების სამმართველოს თანამშრომელი იმყოფებოდა აუცილებელი მოგერიების მდგომარეობაში, საფრთხე იყო რეალური, იმწუთიერი და მისი ქმედების მიზანს მხოლოდ ამ საფრთხიდან საკუთარი თავის და გარშემომყოფთა სიცოცხლის და ჯანმრთელობის დაცვა წარმოადგენდა, ასევე დადასტურდა, რომ სპეციალური დანიშნულების რაზმის არც ერთ წევრს და არც რომელიმე მაღალი თანამდებობის პირს კანონსაწინააღმდეგო და ბრალეული ქმედება არ ჩაუდენია".