ვანო მერაბიშვილმა თითქმის შვიდი წელი გაატარა სამარტოო საკანში, რაც ევროპული სტანდარტებით არის წამების ტოლფასი,- ამის შესახებ “ნაციონალური მოძრაობის” წევრმა თინა ბოკუჩავამ ჟურნალისტებთან საუბრისას განაცხადა.

ჟურნალისტის შეკითხვაზე, შესაძლოა თუ არა, ვანო მერაბიშვილის გაერთიანებული ოპოზიციის შეხვედრებზე ხილვა, ბოკუჩავამ განაცხდა, რომ გადაწყვეტილება თავად მერაბიშვილმა უნდა მიიღოს.

“გადაწყვეტილება მისია, უპირველეს ყოვლისა დღეს გავრცელებულ განცხადებაში მან თქვა, რომ აპირებს პოლიტიკაში მოსვლას, თუმცა არ უთქვამს რა ფორმით, რომელ პარტიაში. ჩემი აზრით, მნიშნველოვანია თავად მან გამოხატოს საკუთარი სურვილი და შემდეგ შევძლოთ ჩვენ ამის კომენტირება. რაც შეეხება სიტყვა “დამხობას”, რა თქმა უნდა, უკეთესად შეიძლებოდა შერჩეულიყო, თუმცა კიდევ ერთხელ ვიმეორებ, ნებისმიერმა ჩვენგანმა ექვსი წელი და ცხრა თვე რომ გაატაროს სამარტოო საკანში, შეიძლება გაუჭირდეს სიტყვების შერჩევა. ცინიზმს, რაც ჩვენ ვიხილეთ ხელისუფლების სხვადასხვა წარმომადგენლების მხრიდან, სამარცხვინოს ვუწოდებდი, ძალიან მსუბუქად რომ ვთქვა”,- აღნიშნა თინა ბოკუჩავამ.

შეგახსენებთ, შინაგან საქმეთა ყოფილმა მინისტრმა, მსჯავრდებულმა ვანო მერაბიშვილმა თითქმის 7-წლიანი პატიმრობის შემდეგ, პენიტენციური დაწესებულება, ე.წ. მატროსოვის ციხე დღეს დატოვა.