მიხეილ ჩხენკელმა პროფესორ ლეშეკ ბალცეროვიჩს თსუ-ს საპატიო დოქტორის წოდების მინიჭება მიულოცა

ივანე ჯავახიშვილის სახელობის თბილისის სახელმწიფო უნივერსიტეტში პროფესორ ლეშეკ ბალცეროვიჩს საპატიო დოქტორის წოდება მიენიჭა. ღონისძიებაში მონაწილეობა საქართველოს განათლების, მეცნიერების, კულტურისა და სპორტის მინისტრმა მიხეილ ჩხენკელმა მიიღო, რომელმაც დამსწრე საზოგადოებას სიტყვით მიმართა და პროფესორ ბალცეროვიჩს საპატიო დოქტორის წოდების მინიჭება პირადად მიულოცა.

ამის შესახებ „ინტერპრესნიუსს“ განათლების სამინისტროდან აცნობეს.

„პროფესორ ბალცეროვიჩის მიერ განხორციელებულმა ეკონომიკურმა რეფორმებმა, რომელიც „ბალცეროვიჩის გეგმის“ სახელით არის ცნობილი, მნიშვნელოვანი ეფექტი მოახდინა პოსტ-კომუნისტურ ქვეყნებზე, მათ შორის, წვლილი შეიტანა საქართველოს საბაზრო ეკონომიკის პრინციპებზე გადასვლაში. მისი მრავალწლიანი კარიერა არაერთ პრესტიჟულ ჯილდოს ითვლის და ჩვენ ვამაყობთ იმით, რომ პროფესორ ბალცეროვიჩს დღეს თბილისის სახელმწიფო უნივერსიტეტის საპატიო დოქტორის წოდება მიენიჭა. ამით ვადასტურებთ მის მაღალ აკადემიურ მიღწევებსა და საზოგადოების განვითარებაში შეტანილ განსაკუთრებულ წვლილს. მინდა კიდევ ერთხელ გავუსვა ხაზი პროფესორ ბალცეროვიჩის მიღწევების მნიშვნელობას, მივულოცო ეს მნიშვნელოვანი ჯილდო და ვუსურვო წარმატება მომავალ საქმიანობაში.“ - განაცხადა მიხეილ ჩხენკელმა.

ლეშეკ ბალცეროვიჩისთვის საპატიო დოქტორის წოდება მინიჭების ცერემონიას თბილისის სახელმწიფო უნივერსიტეტის რექტორი გიორგი შარვაშიძე უძღვებოდა.

ე.წ. „შოკური თერაპიის“ ავტორი ლეშეკ ბალცეროვიჩი პოლონელი ეკონომისტი, სახელმწიფო მოღვაწე და ვარშავის ეკონომიკის სკოლის პროფესორია. 1989 წელს იგი გახდა ტადეუს მაზოვიეცკის პირველი არაკომუნისტური მთავრობის ფინანსთა მინისტრი და ხელმძღვანელობდა თავისუფალი ბაზრის ეკონომიკურ რეფორმებს, რომლის შედეგად პოლონეთის ეკონომიკა ევროპაში ერთ-ერთი საუკეთესო გახდა. სხვადასხვა წლებში ის იკავებდა პოლონეთის ეროვნული ბანკის თავმჯდომარის, პრემიერ-მინისტრის მოადგილის და სხვა მაღალი რანგის თანმდებობებს.

ლეშეკ ბალცეროვიჩი მსოფლიოს 20-ზე მეტი უნივერსიტეტის საპატიო დოქტორია. წარმატებული კარიერის განმავლობაში, მას ისეთი პრესტიჟული ჯილდოები აქვს მიღებული, როგორებიცაა: ლუდვიგ ერჰარდის სახელობის პრემია, ტრანსატლანტიკური ლიდერების ჯილდო, კარლ ბერტელმანის პრემია (ჩარლ Bერტელსმანნ Pრიზე) და სხვა.

ლეშეკ ბალცეროვიჩი არის 100-ზე მეტი პუბლიკაციის ავტორი პოლონეთსა და მის ფარგლებს გარეთ.

ტოომას ჰენდრიკ ილვესი - არ გჭირდებათ ევროკავშირის დროშების ყველგან აღმართვა, თუ მის ღირებულებებს არ იზიარებთ - სიტყვების თქმით: ”ჩვენ ევროპელები ვართ“, ევროკავშირში ავტომატურად ვერ შეხვალთ
ქართული პრესის მიმოხილვა 09.04.2021
ლევან დოლიძე - რაც უფრო დიდხანს გაგრძელდება ვაშინგტონსა და ბრიუსელში ჩვენს შიდა პრობლემებზე მსჯელობა, მით უფრო გაგვიჭირდება მათთან იმ საკითხებზე საუბარი, რასაც ქვეყნის ინტერესები მოითხოვს
ბექა ნაცვლიშვილი - როგორც ჩანს, "ქართული ოცნება“ ემზადება მოლაპარაკების მესამე რაუნდისთვის და აგრძელებს კომუნიკაციას ევროკავშირთან, ამის შედეგი კი იქნება ის, თუ რა მოხდება მელიას გადადებულ სასამართლოზე
კახა ოქრიაშვილი - 15 მაისის აქციის სამზადისში აქტიურად ვარ ჩართული
ხარისხი გარანტირებულია: "კარფური" „მასტერშეფის“ ახალი სეზონის გენერალური სპონსორი და მხარდამჭერი გახდა