ინფექციური საავადმყოფოს გენერალური დირექტორის, თენგიზ ცერცვაძის განცხადებით, კორონავირუსით ინფიცირებულ მეოთხე პაციენტთან კონტაქტში მყოფი პირები იდენტიფიცირებულები არიან და მათ ეპიდემიოლოგები იკვლევენ.

ცერცვაძის თქმით, ჯერჯერობით ისინი საავადმყოფოში არ იმყოფებიან, თუმცა კლინიკური სიმპტომების გამოვლენის შემთხვევაში აუცილებლად გადმოიყვანენ.

"მეოთხე პაციენტთან ვისაც ჰქონდა კონტაქტი, ისინი საავადმყოფოში ჯერ არ იმყოფებიან იმიტომ, რომ ამ კონტაქტებს იკვლევს დაავადებათა კონტროლის ცენტრი. რამდენადაც ვიცი, მასთან კონტაქტური რამდენიმე კაცი იყო, ისინი იდენტიფიცირებულები არიან და მათ იკვლევენ ეპიდემიოლოგები. თუ რომელიმე მათგანს გამოუვლინდება კლინიკური სიმპტომები ისინი გადმოყვანილები იქნებიან კლინიკაში",-განაცხადა თენგიზ ცერცვაძემ.

შეგახსნებთ, რომ საქართველოში ახალი კორონავირუსის პირველი შემთხვევა 2020 წლის 26 თებერვალს დაფიქსირდა. ვირუსი დაუდგინდა საქართველოს მოქალაქეს, რომელიც შემოვიდა აზერბაიჯანის გავლით ირანიდან. კორონავირუსის მეორე შემთხვევა ქვეყანაში 28 თებერვალს დაფიქსირდა. ვირუსი იტალიიდან ჩამოსულ მოქალაქეს დაუდგინდა. კორონავირუსის მესამე შემთხვევა 29 თებერვალს დაფიქსირდა, ვირუსი დაუდგინა საქართველოს მოქალაქეს, რომელიც ირანში იმყოფებოდა. მეოთხე შემთხვევა კი დღეს, 5 მარტს დადასტურდა. კორონავირუსი 44 წლის მამაკაცს დაუდგინდა, რომელიც იტალიაში იმყოფებოდა.

ოთხივე პაციენტი თბილისის ინფექციურ საავადმყოფოს ბოქსირებულ კლინიკაში გადის მკურნალობას.