ჩრდილოეთ კორეამ აღმოსავლეთ სანაპიროდან ზღვის მიმართულებით დაუდგენელი სახეობის სამი ჭურვი ისროლა, - ამის შესახებ „როიტერსი“ სამხრეთ კორეის გაერთიანებულ შტაბზე დაყრდნობით იუწყება.

მათივე ინფორმაციით, ჭურვები სანაპირო ქალაქ სონდოკიდან გაუშვეს, სადაც სამხედრო აეროდრომი მდებარეობს.

შეგახსენებთ, ჩრდილოეთ კორეამ აღმოსავლეთ სანაპიროდან 2 მარტს ორი ახლო რადიუსის რაკეტა გაუშვა. ოფიციალური ინფორმაციით, რაკეტების გაშვება ტრადიციული სამხედრო წვრთნების ფარგლებში განხორციელდა და მას ჩრდილოეთ კორეის ლიდერი კიმ ჩენ ინი პირადად ადევნებდა თვალს.

დიდმა ბრიტანეთმა, გერმანიამ, საფრანგეთმა, ესტონეთმა და ბელგიამ ხუთშაბათს გამართულ გაეროს უშიშროების საბჭოს სხდომაზე ჩრდილოეთ კორეის მიერ რაკეტების გაშვების საკითხი დააყენეს და განაცხადეს, რომ ეს არის „პროვოკაციული ქმედება“, რომელიც გაეროს რეზოლუციებს არღვევს.