მამუკა მდინარაძის განცხადებით, მაჟორიტარი დეპუტატები 120/30 მოდელს მხარს უჭერენ და ამ მხრივ გამონაკლისი მხოლოდ კახა ოქრიაშვილია
საპარლამენტო უმრავლესობის ლიდერის, მამუკა მდინარაძის განცხადებით, მაჟორიტარი დეპუტატები 120/30 მოდელის საარჩევნო სისტემას მხარს უჭერენ და ამ მხრივ გამონაკლისი მხოლოდ კახა ოქრიაშვილია.
როგორც მან ჟურნალისტებთან განაცხადა, მაჟორიტარი დეპუტატების მხრიდან ბოლო პერიოდში დასმულ ყველა კითხვას პასუხი გაეცა და მათ შეთანხმებულ საარჩევნო სისტემასთან დაკავშირებით არანაირი პრობლემა არ აქვთ.
„კითხვები, რომელიც მაჟორიტარი დეპუტატების მხრიდან ისმოდა მთელი ბოლო პერიოდის განმავლობაში, არის პასუხგაცემული და აქედან გამომდინარე, მაჟორიტარებს არანაირი პრეტენზია ამ შეთანხმებასთან და კომპრომისთან დაკავშირებით არ აქვთ. კითხვებზე პასუხებია გაცემული, რაც დამაკმაყოფილებელი აღმოჩნდა ყველა მაჟორიტარისთვის, არის გამონაკლისი ასეთი კახა ოქრიაშვილი, ჩვენი მეგობარი და კოლეგა, რომელიც თავიდანაც საკმაოდ ხისტ პოზიციაზე იყო და ასეთივე ხისტ პოზიციას აფიქსირებს დღესაც“, - განაცხადა მდინარაძემ.
