საქართველოს პარლამენტის ვიცე- სპიკერის გიორგი კახიანის განცხადებით, საკონსტიტუციო ცვლილებების პროექტში ბლოკების საკითხი გათვალისწინებულია, ხოლო ბარიერი ბლოკში გაერთიანებული პარტიების რაოდენობის შესაბამისი იქნება.

მისივე თქმით, ოპოზიციასთან რამდენიმე საათის წინ გამართულ შეხვედრაზე შეჯერებული იქნა ასევე ოლქების საკითხი, კერძოდ თბილისში 8 ოლქი იქნება, ხოლო კახეთის რეგიონს 3 ოლქის ნაცვლად, 2 ოლქი დარჩება.

"ჩვენი მოსაზრება თავიდან ბლოკებთან დაკავშირებით, იცით, რომ იყო უარყოფითი, თუმცა შეხვედრაზე, რომელიც ერთი ორი საათის წინ იყო, გადაწყდა, რომ ბლოკების არსებობა იქნება შესაძლებელი, იმ პირობით, რომ ბლოკებთან მიმართებაში იქნება განსხვავებული ბარიერი და ბარიერის რაოდენობა იქნება დამოკიდებული ბლოკებში გართიანებული პოლიტიკური პარტიების რაოდენობაზე. ანუ, თუ ბლოკში გაერთიანდება ორი პარტია, ბარიერი იქნება 2 პროცენტი, თუ იქნება 7 პარტია, ბარიერი იქნება 7 პროცენტი. ეს არის უკვე ბოლო შეხვედრის შემდეგ შეჯერებული პოზიცია, რაც ასახულია პროექტში. ოლქებს, რაც შეეხება, თბილისში ნაცვლად 7 - ისა არის 8 ოლქი და ოპოზიციასთან საბოლოო კონსულტაციების შედეგად გადაწყდა, რომ თბილისში არის 8 ოლქი და კახეთში ნაცვლად სამისა- ორი",- განაცხადა კახიანმა.