საარჩევნო სისტემის ცვლილებასთან დაკავშირებული საკონსტიტუციო პროექტის საყოველთაო სახალხო განხილვის ფორმატთან დაკავშირებით მმართველი გუნდს ოპოზიციასთან კონსულტაციები ექნება. აღნიშნულის შესახებ პარლამენტის ვიცე- სპიკერმა გიორგი კახიანმა ჟურნალისტებთან განაცხადა.

როგორც მან აღნიშნა, კონსტიტუციური ცვლილებების პროექტს ხელს უმრავლესობის 85 წევრი აწერს.

"თქვენ იცით, რომ როგორც ამას პროცედურა ითვალისწინებს, პირველ რიგში საპროცედურო კომიტეტს გადაეცა ეს საკითხი და უახლოეს დღეებში იმსჯელებს ამ ხელმოწერების ნამდვილობაზე. ეს არის პროცედურული დეტალი, რაც აუცილებელია, რომ კონსტიტუციურმა პროექტმა გაიაროს და უკვე მომდევნო კვირას პარლამენტი მიიღებს გადაწყვეტილებას და შექმნის საყოველთაო სახალხო განხილვის კომისიას. მოგეხსენებათ, რომ კონსტიტუციური ცვლილება ითვალისწინებს, ერთი თვის განმავლობაში საყოველთაო სახალხო განხილვების ჩატარებას და ეს პირობა აუცილებლად შესრულდება. თუმცა, გამომდინარე იქიდან, რომ არ არის ორდინალური სიტუაცია ერთი მხრივ კორონავირუსის გამო და მეორე მხრივ, მოგეხსენებათ, რომ ამ ინიციატივასთან დაკავშირებით არსებობს პოლიტიკური კონსენსუსი, ამიტომ ფორმატი, როგორი იქნება საყოველთაო სახალხო განხილვის ამაზე, ჩვენ კიდევ მსჯელობა, მათ შორის, რა თქმა უნდა, კონსულტაციები ოპოზიციის წარმომადგენლებთან გვექნება და მიზანშეწონილობიდან გამომდინარე ვიმოქმედებთ,"- განაცხადა გიორგი კახიანმა.