საფრანგეთში, კორონავირუსის ეპიდემიის საფრთხის მიუხედავად, ადგილობრივი არჩევნები ტარდება. არჩევნები სპეციალური ჰიგიენური და ჯანდაცვითი ნორმების დაცვით მიმდინარეობს. ხელისუფლებამ საარჩევნო უბნებზე უპრეცედენტო სანიტარული ნორმების დაცვის განკარგულება გასცა. ადგილზე მომარაგებულია სპეციალური საშუალებები და საარჩევნო უბანზე მისულ ამომრჩევლებს მოეთხოვებათ, ხმის მიცემამდე ხელები სადეზინფექციო ხსნარით დაიმუშაონ. ასევე, მოქალაქეებმა თან უნდა იქონიონ საწერი კალმები.

ამომრჩევლებმა ერთმანეთისგან უსაფრთხო დისტანციაც უნდა დაიცვან. არჩევნების გადადებაზე საფრანგეთის პრეზიდენტმა ემანუელ მაკრონმა უარი თქვა, რადგან, მისი აზრით, ეს არადემოკრატიული იქნებოდა. ადგილობრივი არჩევნები ქვეყნის 35 000 მუნიციპალურ ერთეულში ტარდება.

შეგახსენებთ, დღეს ცნობილი გახდა, რომ კორონავირუსის გამო საფრანგეთში ყველა რესტორანი, კაფე, კინოთეატრი და კლუბი იხურება. მანამდე ხელისუფლებამ ქვეყანაში სკოლები დახურა და 100 კაცზე მეტის შეკრება აკრძალა.