საქართველოს პრემიერ-მინისტრის მრჩევლის, სოზარ სუბარის განცხადებით, მარნეულსა და ბოლნისში საკარანტინო სივრცეები სრულად არ არის დატვირთული.

როგორც სუბარმა კორონავირუსთან დაკავშირებით შექმნილი უწყებათაშორისი საკოორდინაციო საბჭოს სხდომის დასრულების შემდეგ გამართულ ბრიფინგზე განაცხადა, საჭიროების შემთხვევაში, ამ მუნიციპალიტეტებშიც, როგორც საქართველოს სხვა ტერიტორიებზე სასტუმროებია მოძიებული.

„იქ არის საკარანტინო სივრცეები გამოყოფილი. ისინი სრულად არ არის დატვირთული. არის სასტუმროები, როგორც საქართველოს სხვა ტერიტორიებზე და ჯერჯერობით არ ჩანს ამის სურათი, რომ საჭირო გახდეს, მაგრამ, თუ საჭირო გახდა, ისიც მოძიებულია. ღმერთმა არ ქნას რაც ევროპაში ხდება, რომ სტადიონებზე და სპორტულ დარბაზებშია საკარანტინო სივრცეები მოწყობილი და ჩალაგებულია საწოლები ნახევარი მეტრის დაშორებით, ამის საჭიროებას ჩვენთან ვერ ვხედავთ, თუმცა ესეც კი გათვალისწინებულია, თუ შორეულ მომავალში მსგავსი რამე მოხდა, გნებავთ მარნეულ-ბოლნისში და გნებავთ საქართველოს სხვა წერტილში“,- განაცხადა სუბარმა.