აკადემიკოს ვახტანგ ბოჭორიშვილის სახელობის კლინიკის დირექტორის, კახა იშხნელის განცხადებით, კლინიკაში მოთავსებული 2 წლის ბავშვთან მიმართებით კორონავირუსი მსუბუქ ფორმებში და უსიმპტომოდ მიმდინარეობს.
როგორც მან ჟურნალისტებს განუცხადა, გამოკვლევებისთვის 7 პაციენტის ანალიზია გადაგზავნილი და მათი პასუხები დაახლოებით 5-6 საათის განმავლობაში გახდება ცნობილი.
„ამჟამად ჩვენს კლინიკაში მოთავსებულია 16 პაციენტი, რომელთა შორის 5 დადასტურებული ფორმაა, რომელსაც ვმკურნალობთ და მდგომარეობა დადებითი დინამიკით მიმდინარეობს. დანარჩენი პაციენტები ანალიზის პასუხებს ელოდებიან. საბედნიეროდ, სწრაფად ხდება ეს ბრუნვა ჩვენს კლინიკაში. ისინი დროულად ტოვებენ ხოლმე კლინიკას. ახალ პასუხებს დაახლოებით 5-6 საათის განმავლობაში ვიღებთ.
საშუალოდ, ღამის განმავლობაში 6-7 ანალიზი იგზავნება, რომელზედაც მოგვდის ინფორმაცია ან უარყოფითი შედეგები და შესაბამისად, ისინი კარანტინში გადაგვყავს. დღესაც გადაგზავნილია 7 პაციენტის ანალიზი“,-აცხადებს იშხნელი.
მისი განმარტებით, ბავშვს ვირუსი მსუბუქ ფორმებში აქვს, თუმცა მისი მდგომარეობა მაინც საყურადღებოა.
„კლასიკური ვარიანტია. რა თქმა უნდა, ბავშვთან ვირუსი მსუბუქ ფორმებში მიდის, თითქმის უსიმპტომოა. გუშინაც გითხარით და დღესაც ვადასტურებ, რომ ეს ყველაფერი უსიმპტომოდ მიმდინარეობს. მხოლოდ და მხოლოდ სწორად დაგეგმილი კვლევების საფუძველზე დადგინდა. რა თქმა უნდა, ბავშვის მდგომარეობა ჩვენთვის ძალიან საყურადღებოა“, - აცხადებს კახა იშხნელი.
ცნობისთვის, ამ დროისთვის საქართველოში კორონავირუსით 81 ადამიანია დაინფიცირებული, მათგან 13 გამოჯანმრთელდა.