"ერთიანი ნაციონალური მოძრაობის" წარმომადგენლებმა ემიგრანტების სამშობლოში დაბრუნების ინიციატივასთან დაკავშირებით მთავრობას უკვე ოფიციალურად მიმართეს. მათ მთავრობის ადმინისტრაციას დეტალურად მიაწოდეს ინფორმაცია უკრაინული ავიაკომპანიის, დაგეგმილი რეისებისა და საზღვარგარეთ მყოფი საქართველოს ათასობით მოქალაქის შესახებ.

"პრეზიდენტი სააკაშვილი მზად არის გააგრძელოს ეს მოლაპარაკებები და ჩვენ გვექნება შესაძლებლობა, რომ 5000-მდე ჩვენი თანამოქალაქე სრულიად უსასყიდლოდ დავაბრუნოთ სამშობლოში. ეს არის უმნიშვნელოვანესი, რომ ჩვენს მოქალაქეებს ჰქონდეთ საშუალება ამ კრიზისის დროს დაბრუნდნენ სამშობლოში. თუმცა ამისთვის, ამ სამაშველო ოპერაციისთვის საჭიროა ხელისუფლების მონაწილეობა",-განაცხადა "ნაციონალური მოძრაობის" წევრმა თინა ბოკუჩავამ.

ცნობისთვის, საქართველოს ყოფილმა პრეზიდენტმა მიხეილ სააკაშვილმა მზაობა გამოთქვა, რომ მთავრობასთან კოორდინაციით ემიგრანტების სამშობლოში დაბრუნება უზრუნველყოს. როგორც „ერთიანი ნაციონალური მოძრაობის ლიდერმა გრიგოლ ვაშაძემ დღეს ამ ინიციატივასთან დაკავშირებით განაცხადა, მათ უკვე მოძიებული აქვთ ავიაკომპანია, რომელიც ევროპის სხვადასხვა ქალაქიდან საქართველოს მიმართულებით ფრენებს განახორციელებს და საქართველოს მოქალაქეების სამშობლოში დაბრუნებას ისინი უფასოდ უზრუნველყოფენ.

იხილეთ ვიდეო: „ნაციონალურმა მოძრაობამ“ ემიგრანტების სამშობლოში დაბრუნების ინიციატივასთან დაკავშირებით მთავრობას ოფიციალურად მიმართა