აზერბაიჯანმა საკარანტინე ზომები გაამკაცრა და 31 მარტიდან მოსახლეობას სახლიდან გასვლა მხოლოდ უკიდურესი აუცილებლობის შემთხვევაში შეეძლება. ამის შესახებ მთავრობასთან არსებული ოპერატიული შტაბი იუწყება.

შტაბის ინფორმაციით, მოსახლეობის საცხოვრებლის დატოვება შეეძლება მხოლოდ მაშინ, თუ დასჭირდებათ გადაუდებელი სამედიცინო დახმარება, თუ მათ სიცოცხლეს შეექმნება უშუალო საფრთხე, ასევე, სავაჭრო და მომსახურების ობიექტებში წასვლისას, საყოფაცხოვრებო ნარჩენების გატანისას, ასევე სამსახურებრივი მოვალეობის შესრულებისთვის იმ სამსახურებში, რომლებიც განსაკუთრებული რეჟიმის პერიოდში იმუშავებს.

მანამდე ქვეყანაში არსებული შეზღუდვა ვრცელდებოდა მხოლოდ 65 წლის და უფროსი ასაკის ადამიანებზე.

აზერბაიჯანში 24 მარტიდან საგანგებო მდგომარეობაა გამოცხადებული. ქვეყანაში კორონავირუსის 273 შემთხვევაა გამოვლენილი, რომელთაგან 26 გამოჯანმრთელდა, ოთხი კი გარდაიცვალა.