მიხეილ ჩხენკელი - საკოორდინაციო საბჭოს გადაწყვეტილებით, სკოლებს დისტანციური სწავლების ქართულ საკომუნიკაციო პლატფორმა „ფიდსს“ ვთავაზობთ

პრემიერ-მინისტრის ხელმძღვანელობით გამართული მორიგი საკოორდინაციო საბჭოს დასრულების შემდეგ, საქართველოს განათლების, მეცნიერების, კულტურისა და სპორტის მინისტრმა მიხეილ ჩხენკელმა კომენტარი გააკეთა, რომლის დროსაც ისაუბრა შექმნილი ვითარების ფონზე დისტანციური სწავლების იმ საინტერესო ფორმატებზე, რასაც სამინისტრო საზოგადოებას სთავაზობს. მათ შორის, მინისტრმა დისტანციური ონლაინ სწავლების ახალ ქართულ პლატფორმაზე, “Feedc Edu”- ზე გაამახვილა ყურადღება, რომელსაც საქართველოს განათლების, მეცნიერების, კულტურისა და სპორტის სამინისტრო საჯარო სკოლებს ონლაინ სწავლებისთვის ერთ-ერთ ალტერნატიულ საკომუნიკაციო საშუალებად სთავაზობს.

„როგორც მოგეხსენებათ კორონავირუსის გამოწვევის გამო, დროებით შეჩერებულია მეცადინეობები საკლასო ოთახებსა და აუდიტორიებში, მაგრამ ამ გამოწვევამ არ უნდა შეაჩეროს სასწავლო პროცესი. აქედან გამომდინარე სკოლები და უნივერსიტეტები გადასული არიან სწავლების დისტანციურ ფორმაზე. გუშინ დაიწყო უაღრესად მნიშვნელოვანი, ძალიან ძლიერი და საინტერესო პროექტი ტელესკოლა, რომელსაც ჩვენი სამინისტრო საქართველოს პირველ არხთან ერთად ახორციელებს. აღსანიშნავია, რომ ამ პროექტის ფარგლებში წვდომა ტელესკოლასთან აქვს ყველა მოსწავლეს განურჩევლად იმისა აქვთ, თუ არა წვდომა ინტერნეტთან.

ამ ინიციატივებს დაემატა კიდევ ერთი სიახლე და საკოორდინაციო საბჭოს გადაწყვეტილებით, დღეს სკოლებს დისტანციური სწავლების ქართული საკომუნიკაციო პლატფორმა „ფიდსი“ შევთავაზეთ. დიდი მადლობა მინდა გადავუხადო კომპანია „ფიდსს“ გამოჩენილი მაღალი საზოგადოებრივი პასუხისმგებლობისთვის.

“Feedc Edu”-ს პლატფორმა სრულიად უფასოა, სრულყოფილად მუშაობს ნებისმიერ სმარტფონზე და არ სჭირდება მაღალი სიჩქარის ინტერნეტი. მასზე შესაძლებელია დავალებების გაზიარება, ფაილების ატვირთვა/ჩამოტვირთვა და ჯგუფური მეცადინეობის წარმართვა. მისი გამოყენება მარტივია, როგორც მასწავლებლისთვის, ასევე მოსწავლისა და მშობლისთვის. ასევე, მარტივია რეგისტრაციის გავლა, რაც მობილური ტელეფონის ნომრით არის შესაძლებელი“,-განაცხადა მინისტრმა.

დისტანციური სწავლების მეთოდებზე საუბრისას, მიხეილ ჩხენკელმა ყურადღება კიდევ ერთხელ გაამახვილა სამინისტროსა და საქართველოს პირველი არხის თანამშრომლობით დაწყებულ პროექტზე „ტელესკოლა“ და აღნიშნა, რომ ამ პროექტით მიღებული განათლება იქნება აუცილებლად საინტერესო და ეფექტიანი.

„ტელესკოლის მეთოდით მიღებული განათლება იქნება აუცილებლად ეფექტიანი, რადგანაც გაკვეთილებში ჩართული გვყავს ჩვენი საუკეთესო, გამოცდილი პედაგოგები. პროექტი დიდი წარმატებით დაიწყო გუშინ და დარწმუნებული ვარ, რომ ასევე ძალიან წარმატებით გაგრძელდება. უაღრესად საინტერესო გაკვეთილებია შემოქმედებითი მიდგომით და ეს პლატფორმა მიაღწევს საკმაოდ საინტერესო აკადემიურ შედეგებს. ამ პროექტის ფარგლებში ტარდება აბიტურიენტის საათი, სადაც წამყვანი სპეციალისტები კონსულტაციებს გაუწევენ აბიტურიენტებს ეროვნულ გამოცდებთან დაკავშირებით. გაკვეთილები ტარდება ორშაბათიდან პარასკევის ჩათვლით, ხოლო შაბათ-კვირას ტელესკოლა მთელ საზოგადოებას შესთავაზებს ძალიან საინტერესო შემეცნებით პროგრამებს - როგორც საქართველოში მომზადებულ პროგრამებს, ასევე უცხოურ პროგრამებს ნათარგმნს ქართულ ენაზე. ეს საინტერესო იქნება არამხოლოდ სკოლის მოსწავლეებისთვის, არამედ მათი მშობლებისა და მთელი საზოგადოებისთვის“,-აღნიშნა მიხეილ ჩხენკლმა.

აღნიშნულ ინფორმაციას საქართველოს განათლების, მეცნიერების, კულტურისა და სპორტის სამინისტრო ავრცელებს.

ალექსეი გარანი - უკრაინის ნატო-ში გაწევრიანებას რუსეთის პრეზიდენტი პუტინი აჩქარებს
ქართული პრესის მიმოხილვა 10.05.2021
ხათუნა ლაგაზიძე - თუ ოპოზიციას რაციონალიზმი კი არა, თვითგადარჩენის ინსტინქტი მაინც შერჩენია, მოუწევთ გაერთიანება იმ საფრთხის წინააღმდეგ, რასაც ასპარეზზე ახალი პოლიტიკური ჯგუფების გამოჩენა ჰქვია
„გაგუას კლინიკაში“ covid 19–ის საწინააღმდეგო ვაქცინაციის კაბინეტი გაიხსნა