ერთადერთი, რაც იწვევს ჩვენს განსაკუთრებულ ყურადღებას, არის კიდევ 2 პაციენტი, რომლებზეც ახლა ძალიან ღრმა კვლევა მიმდინარეობს, - ამის შესახებ დაავადება კონტროლის ეროვნული ცენტრის დირექტორის მოადგილე პაატა იმნაძემ მთავრობის ადმინისტრაციაში გამართულ ბრიფინგზე განაცხადა.

იმნაძის განმარტებით, 5 ახალი პაციენტიდან 3 პაციენტზე ეპიდემიოლოგიური სურათის შეცვლას არ ელოდებიან, თუმცა 2 შემთხვევაში „ძალიან ღრმა კვლევა ტარდება.“

„მძიმე პაციენტების რაოდენობა არ გაზრდილა. საერთო ჯამში დაგვემატა 5 ახალი პაციენტი. მათი მდგომარეობა არ არის საგანგაშო, ერთადერთი რაც იწვევს ჩვენს განსაკუთრებულ ყურადღებას არის კიდევ 2 პაციენტი, რომლებზეც ახლა ძალიან ღრმა კვლევა მიმდინარეობს. 3 პაციენტზე ეპიდემიოლოგიური სურათის შეცვლას არ ველოდებით, 2 საკარანტინო ზონიდანაა და ერთი უკვე დადგენილი კლასტერის კონტაქტია. ამ შემთხვევაში ჩვენ არავითარი შეშფოთების საფუძველი არ გვაქვს, თუმცა 2 შემთხვევაში ძალიან ღრმა კვლევა ტარდება,“ - განაცხადა პაატა იმნაძემ.

ცნობისთვის, ამ დროისთვის საქართველოში კორონავირუსის დადასტურებული შემთხვევა 115 შემთხვევაა, მათ შორის გამოჯანმრთელებულია 23 პაციენტი.