საქართველოში კორონავირუსის გავრცელების პრევენციის მიზნით თავდაცვის ძალების IV მექანიზებული და V საარტილერიო ბრიგადების ტერიტორიაზე თავდაცვის ძალების ლოჯისტიკის სარდლობამ სადეზინფექციო სამუშაოები ჩაატარა.
როგორც „ინტერპრესნიუსს“ თავდაცვის სამინისტროდან აცნობეს, სამხედრო ნაწილების სადეზინფექციო ჯგუფების მიერ სპეციალური ხსნარით ყოველდღიურად მუშავდება სასადილოები, საცხოვრებელი ყაზარმები, დერეფნები და სველი წერტილები. ასევე, დეზინფექცია რეგულარულად უტარდება გზის სავალ ნაწილსა და საკონტროლო გამშვებ პუნქტებს.
მათივე ცნობით, თავდაცვის ძალების სამედიცინო დეპარტამენტი, ვირუსული ინფექციის გავრცელების პრევენციის მიზნით, მუდმივად ახორციელებს თითოეული ქვედანაყოფის სანიტარულ-ეპიდემიოლოგიური მდგომარეობის მონიტორინგს.
იხილეთ ვიდეო: თავდაცვის ძალების სამხედრო ბაზებზე სადეზინფექციო სამუშაოები ყოველდღიურად მიმდინარეობს