“ენერგო-პრო ჯორჯია” აბონენტებს მიმართავს, დროულად მოახდინონ მოხმარებული ელექტროენერგიის დავალიანების დაფარვა

ელექტროენერგიის შეწყვეტის თავიდან აცილების მიზნით, “ენერგო-პრო ჯორჯია” თხოვნით მიმართავს მომხმარებლებს, დროულად გადაიხადოთ დავალიანება, ვინაიდან 28 აპრილიდან დაიწყება კომერციული აბონენტების გათიშვის პროცესი, ხოლო 29 აპრილიდან დაიწყება მოსახლეობისათვის ელექტროენერგიის მიწოდების შეწყვეტა. ამის შესახებ „ინტერპრესნიუსს“ “ენერგო-პრო ჯორჯიადან” აცნობეს. მათივე ცნობით, ავტომობილების გადაადგილების შეზღუდვის პირობებში, კომპანიამ კიდევ ერთხელ გაითვალისწინა აბონენტთა რთული მდგომარეობა და არ განახორციელა დავალიანების მქონე აბონენტების გათიშვა, თუმცა დღეიდან 27 აპრილიდან ეს შეზღუდვა გაუქმებულია.

კომპანიის ინფორმაციით, ,,ენერგო-პრო ჯორჯია“ კვლავ გამოთქვამს მზაობას, განიხილოს აბონენტთა განცხადებები დავალიანებების განწილვადების შესახებ. ,,ენერგო-პრო ჯორჯია“ განსაკუთრებულ მადლობას უხდის ყველა იმ აბონენტს, რომლებმაც უკვე განახორციელეს დავალიანების დაფარვა, რეალურად ყველა ასეთმა გადამხდელმა აბონენტმა უზრუნველყო, გათიშვების არასასურველი პროცესის მაქსიმალური გადავადება. 751 852 აბონენტმა დააკმაყოფილა კრიტერიუმი (200 კილოვატამდე მოხმარება) და ისარგებლა სახელმწიფო სუბსიდიით.