ჰოსპიტლების საერთაშორისო ორგანიზაციების ქსელის IHF-ის მიერ ორგანიზებული საერთაშორისო სამეცნიერო კონფერენცია, რომელიც წელიწადში ერთხელ იმართება, წელს მთლიანად COVID-19-ის თემას მიეძღვნა,- ამის შესახებ “ინტრეპრესნიუსს” „ევექსიდან” აცნობეს.

მათი ინფორმაციით, მოხსენებების სერია ონლაინ რეჟიმში ჩატარდა და მასში ათასობით ექიმმა მიიღო მონაწილეობა.

„საქართველოდან ერთადერთი წარმომადგენელი, რომელიც ვებინარზე მოხსენებით გამოვიდა, ევექსი ჰოსპიტლების კლინიკური დირექტორი, პროფესორი მამუკა ჩხაიძეა. მოხსენების თემა შეეხო კლინიკური გუნდების გადამზადებას და ჰოსპიტლების ინფრასტრუქტურის მორგებას COVID-19-ის გამოწვევებთან. საქართველოს წარმომადგენელმა მსოფლიოს გაუზიარა საკუთარი წარმატებული გამოცდილება ევექსი ჰოსპიტლების ქსელში დასაქმებული სამედიცინო პროფესიონალების გადამზადების მოდულში.

მსოფლიოს ყველაზე მასშტაბური ონლაინ სამედიცინო კონფერენცია 7 მაისს, თბილისის დროით 15:00 სთ-ზე დაიწყო.

ჰოსპიტლების საერთაშორისო ფედერაცია IHF მსოფლიოს ერთ-ერთი ყველაზე დიდი ჰოსპიტალური გაერთიანებაა, რომლის სრულუფლებიანი წევრი საქართველოდან კავკასიის მედიცინის ცენტრია”,- აღნიშნულია ინფორმაციაში.