ამერიკის შეერთებულ შტატებში კორონავირუსით დაღუპულთა რაოდენობამ 100 000-ს გადააჭარბა, - ამის შესახებ ინფორმაციას „როიტერსი“ ავრცელებს.

სააგენტოს ცნობით, მაისის თვეში ვირუსით დღეში საშუალოდ 1 400 ადამიანი იღუპებოდა, რაც აპრილის თვესთან შედარებით ნაკლები მაჩვენებელია, როდესაც ფატალური შემთხვევების საშუალო დღიური რაოდენობა 2 000 იყო.

რაც შეეხება დადასტურებულ შემთხვევებს, აშშ-ში ეპიდემიის გავრცელების დღიდან კორონავირუსით 1.7 მილიონზე მეტი ადამიანი დაინფიცირდა.

სტატისტიკის თანახმად, აშშ-ში ბოლო სამი თვის განმავლობაში კოვიდ 19-ით იმაზე მეტი ადამიანი დაიღუპა, ვიდრე 1981-1989 წლებში შიდსის ეპიდემიით და ახალი კორონავირუსი გაცილებით მომაკვდინებელია, ვიდრე ბოლო ათწლეულების განმავლობაში გავრცელებული სეზონური გრიპი. „როიტერსის“ ცნობით, აშშ-ში სეზონურმა გრიპმა ყველაზე მეტი ადამიანი 1957-1958 წლებში იმსხვერპლა, როდესაც გარდაცვლილთა რაოდენობამ 116 000-ს მიაღწია.

ცნობისათვის, ბოლო მონაცემებით, მსოფლიოში კორონავირუსით 5.6 მილიონი ადამიანია დაინფიცირებული, დაღუპულთა რაოდენობა კი 350 000-ს აჭარბებს. დაინფიცირებულთა რაოდენობის მიხდევით კვლავ აშშ ლიდერობს, მეორე ადგილი კი ბრაზილიას უჭირავს.

რაც შეეხება ერთ სულ მოსახლეზე გარდაცვლილთა რაოდენობის სტატისტიკას, ამ მხრივ აშშ, რომელსაც ყოველ 10 000 ადამიანზე 3 დაღუპული ჰყავს, მსოფლიოში მერვე ადგილს იკავებს. პირველ ადგილზეა ბელგია, სადაც ყოველ 10 000-ს ადამიანზე 8 დაღუპული მოდის, მესამეზეა ესპანეთი, მეოთხე და მეხუთე ადგილებს კი დიდი ბრიტანეთი და იტალია ინაწილებენ.