თეორიულად შეიძლება ყველაფერი მოხდეს, მაგრამ, მთავარი ის არის, რომ როცა არ უნდა ჩატარდეს არჩევნები, „ქართული ოცნება“ განწირულია ოპოზიციაში გადასასვლელად , - ასე ეხმიანება „ევროპული საქართველოს“ წევრი გიორგი კანდელაკი პარლამენტის ყოფილი თავმჯდომარის, ირაკლი კობახიძის განცხადებას.

როგორც „ინტერპრესნიუსთან“ კანდელაკმა აღნიშნა, მსგავსი განცხადებების გაკეთებისთვის, ამ ეტაპზე ობიექტური საფუძველი არ არსებობს.

„ჩვენი აზრით, ობიექტური საფუძველი მსგავსი დაშვებისა, დღეის მდგომარეობით, არ არსებობს. არჩევნები უნდა ჩატარდეს კონსტიტუციით დადგენილ ვადებში. თეორიულად შეიძლება ყველაფერი მოხდეს, მაგრამ, მთავარი არის ის, რომ როცა არ უნდა ჩატარდეს არჩევნები, „ქართული ოცნება“ განწირულია ოპოზიციაში გადასასვლელად. საზოგადოებაში იმდენად არის შემდგარი ის კონსენსუსი, რომ „ქართული ოცნება“ უნდა ჩაცილდეს ხელისუფლებას და ქვეყნის სათავეში მოვიდეს პროდასავლური ძალების კოალიცია, სადაც ხელისუფლება იქნება გადანაწილებული და დაბალანსებული სხვადასხვა პარტიებს შორის, რომ როცა არ უნდა იყოს არჩევნები, მაინც წააგებს „ქართული ოცნება“. თუმცა, ამჟამად არ არის ობიექტური საფუძველი გადადებაზე სასაუბროდ“, - განაცხადა კანდელაკმა.

ცნობისთვის, "ქართლი ოცნების" აღმასრულებელი მდივნის, პარლამენტის უმრავლესობის წევრის, ირაკლი კობახიძის განცხადებით, თუ კორონავირუსის მეორე ტალღა ოქტომბერში იქნება, შესაძლოა, არჩევნები დეკემბერში ჩატარდეს.

"თუ კორონავირუსის მეორე ტალღა არჩევნებამდე პერიოდს დაემთხვა, ამ შემთხვევაში შეიძლება აუცილებელი გახდეს საგანგებო მდგომარეობის გამოცხადება, თუმცა ამაშიც არ არის არაფერი ტრაგიკული. ბუნებრივია, თუ ეს მოხდა ოქტომბერში და თუ იქნება აუცილებელი, ამ შემთხვევაში ოქტომბერში არ ჩატარდება არჩევნები და ჩატარდება პირობითად, დეკემბერში",- განაცხადა კობახიძემ.