სრულფასოვანი წევრობა, როგორც ევროკავშირში, ასევე ნატოში არის ჩვენი მიზანი, რომლისთვისაც ბევრი რეფორმები და ბევრი შრომა მოგვიწევს,- ამის შესახებ პრემიერ-მინისტრმა გიორგი გახარიამ საქართველოში აშშ-ის საელჩოს მიერ ეუთო/ოდირის რეკომენდაციაზე დაფუძნებული საარჩევნო რეფორმების მიღების შესახებ გავრცელებული განცხადების კომენტირებისას აღნიშნა. პრემიერის თქმით, ევროატლანტიკური ვექტორიდან გამომდინარე, შესაძლოა, მომდევნო 10-15 წელი საქართველო მუდმივი რეფორმების პროცესში იყოს.

„დემოკრატიზაცია რთული პროცესია. საპარლამენტო რესპუბლიკა და პროპორციული საარჩევნო სისტემა თანამედროვე დემოკრატიის ერთ-ერთი ყველაზე დიდი მახასიათებლებია, ამან ფუნდამენტურად უნდა შეცვალოს ჩვენი პოლიტიკური ველი. ეს სერიოზული გამოწვევაა, ეს ყველაფერი უნდა ავითვისოთ. რა თქმა უნდა, ჩვენი დემოკრატიზაციის პროცესი მუდმივი პროცესია. ერთი რამ უნდა ვიცოდეთ, საქართველომ მისი ევროატლანტიკური ვექტორიდან გამომდინარე, მომდევნო 10-15 წელი შეიძლება მუდმივი რეფორმების პროცესში ვიყოთ.რეფორმები ჩვენი მუდმივი მდგომარეობა უნდა გახდეს, იმიტომ რომ ჩვენი ძირითადი მიზანი ქვეყნის სამართლებრივი მოწყობა, დემოკრატიზაციის დონე, ყველაფერი მაქსიმალურად დაუახლოვოთ ევროპულ სტანდარტს. სრულფასოვანი წევრობა როგორც ევროკავშირში, ასევე ნატოში არის ჩვენი მიზანი, რომლისთვისაც ბევრი რეფორმები და ბევრი შრომა მოგვიწევს“,- განაცხადა პრემიერმა.