აშშ-ის პრეზიდენტმა, დონალდ ტრამპმა განაცხადა, რომ ხელი მოაწერა განკარგულებას ჰონგ-კონგის სპეციალური სტატუსის გაუქმების შესახებ, - ამის შესახებ ინფორმაციას “როიტერსი“ ავრცელებს.

სააგენტოს ცნობით, აშშ-ის პრეზიდენტმა განმარტა, რომ აღნიშნული გადაწყვეტილება ჩინეთის დასასჯელად, მის მიერ ჰონგ-კონგთან დაკავშირებით მიღებული უსაფრთხოების ახალი კანონის გამო, მიიღო.

„ჰონგ -კონგისადმი ჩვენი მიდგომა ახლა იქნება ისეთივე, როგორც ჩინეთისადმი. არანაირი განსაკუთრებული პრივილეგიები, არანაირი განსაკუთრებული ეკონომიკური შეღავათები, სენსიტიური ტექნოლოგიების არანაირი ექსპორტი“, – აღნიშნა აშშ-ის პრეზიდენტმა.

გარდა ამისა, დონალდ ტრამპმა ხელი მოაწერა აშშ-ის კონგრესის მიერ დამტკიცებულ კანონპროექტს სანქციების დაწესების შესახებ. განკარგულების თანახმად ბანკებს, რომლებიც თანამშრომლობენ ჩინეთის ხელისუფლების იმ წარმომადგენლებთან, რომლებიც უსაფრთხოების ახალ კანონს ახორციელებენ, სანქციები დაუწესდებათ.