აზერბაიჯანის თავდაცვის სამინისტრო ავრცელებს კადრებს, რომელშიც მათი განმარტებით, სომხეთის კუთვნილი კიდევ ერთი სამხედრო ობიექტის განადგურებაა ასახული, - ინფორმაციას აზერბაიჯანული სააგენტო APA ავრცელებს.

„თოვუზის რეგიონის მიმართულებით განხორციელებული საბრძოლო ოპერაციების დროს, ჩვენმა შენაერთებმა სომხეთის შეიარაღებული ძალების კიდევ ერთი სამხედრო ობიექტი გაანადგურეს,“- აცხადებენ აზერბაიჯანის თავდაცვის უწყებაში.

წუხელ, გვიან ღამით, აზერბაიჯანის თავდაცვის სამინისტრომ განცხადება გაავრცელა, სადაც აღნიშნული იყო, რომ სიტუაცია თოვუზის მიმართულებით შედარებით წყნარია. თავდაცვის უწყებამ მედიის წარმომადგენლებსა და სოციალური ქსელების მომხმარებლებს მოუწოდა, დაუდასტურებელი, პროვოკაციული ინფორმაციის გავრცელებისგან თავი შეიკავონ და მხოლოდ სამინისტროს მიერ მიწოდებულ ოფიციალურ ცნობებს დაეყრდნონ.

შეგახსენებთ, აზერბაიჯანი-სომხეთის საზღვარზე, თოვუზის რეგიონში დაპირისპირება 12 ივლისს გამწვავდა. საბრძოლო მოქმედებების განახლებაში სომხეთი და აზერბაიჯანი ერთმანეთს ადანაშაულებენ. ცოცხალი ძალის დანაკარგი ორივე მხარემ განიცადა.