ნათია თურნავა - პანდემიის მიუხედავად, საქართველოში ახალი საწარმოები იხსნება

ეკონომიკისა და მდგრადი განვითარების სამინისტროს ინფორმაციით, 100-ზე მეტი ადამიანი დასაქმდა და 15 მლნ ლარის ინვესტიცია განხორციელდა პროგრამის „აწარმოე საქართველოში“ მხარდაჭერით შექმნილ სპილენძისა და ალუმინის სადენების ახალ საწარმოში.

საწარმო დღეს ეკონომიკისა და მდგრადი განვითარების მინისტრმა, ნათია თურნავამ ოფიციალურად გახსნა.

უწყების ცნობით, საწარმოში ინვესტიცია განახორციელა თურქულმა კომპანიამ Koç Kablo. მათივე განმარტებით, საწარმო აღჭურვილია მსოფლიოში არსებული უახლესი ტექნოლოგიით, რაც სრულად ავტომატიზებულ წარმოებასა და დაბალ საწარმოო ფასს უზრუნველყოფს.

„ახალი საწარმო ძალიან მაღალტექნოლოგიური და კონკურენტულია და რაც ძალიან მნიშვნელოვანია, პროდუქცია ექსპორტზე გააქვს. საწარმო შეიქმნა პროგრამის „აწარმოე საქართველოში“ ფარგლებში, სახელმწიფოს დახმარებით და მიუხედავად იმისა, რომ ახლადგახსნილია, ამ ეტაპზე, უკვე ასაქმებს 100 ადამიანს და მომავალში ამ მაჩვენებელს, პრაქტიკულად, გააორმაგებს. მნიშვნელოვანია, რომ ეს არის პირდაპირ უცხოური ინვესტიცია, რომელსაც თურქეთის ერთ-ერთი ძლიერი და გამოცდილი კომპანია ახორციელებს და ჩვენთვის ძალიან მნიშვნელოვანია, რომ მიუხედავად იმ სირთულისა, რაც ახლავს პანდემიას, იქმნება ასეთი ახალი საწარმოები, რომლებიც ასაქმებენ ჩვენს მოქალაქეებს და აძლიერებენ საქართველოს საექსპორტო პოტენციალს,“ - განაცხადა ნათია თურნავამ.

ეკონომიკის სამინისტროს ინფორმაციით, კომპანიას 2018 წლის თებერვალში პროგრამით „აწარმოე საქართველოში“ 9502 კვ.მ. მიწის ნაკვეთი გადაეცა.

„პროექტი განსაკუთრებით მნიშვნელოვანია მისი საექსპორტო პოტენციალიდან გამომდინარე. საწარმო, ძირითადად, პროდუქტს აწარმოებს საექსპორტო ბაზრებისთვის. ამჟამად კომპანიას მიღებული აქვს მსხვილი შეკვეთა ბურკინა-ფასოდან და განადან, ასევე აწარმოებს მოლაპარაკებებს დიდ ბრიტანეთთან და ყურის ქვეყნებთან.

საწარმო, სრულად დატვირთვის შემდეგ, დაასაქმებს დაახლოებით 250 ადამიანს. მისი საწარმო სიმძლავრე წლის განმავლობაში არის 12 000 ტონა სპილენძისა და ალუმინის დამუშავება. რაც ფინანსური მაჩვენებლებით შეადგენს 300 მლნ ლარის ღირებულების პროდუქციის წარმოებას, 40 მლნ დამატებითი ღირებულების შექმნას და მილიონობით ლარის გადასახადების შედინებას ბიუჯეტში.

საწარმოს გახსნაში ასევე მონაწილეობდნენ ეკონომიკისა და მდგრადი განვითარების მინისტრის მოადგილე ირაკლი ნადარეიშვილი, სააგენტოს „აწარმოე საქართველოში“ დირექტორი მიხეილ ხიდურელი, საწარმოს გენერალური დირექტორი ირაკლი ბრეგვაძე და სხვა ოფიციალური პირები და ბიზნესის წარმომადგენლები“, - განმარტავენ უწყებაში.

კახა გოგოლაშვილი - ევროკავშირის მედიაცია გახდა ინსტრუმენტი, რომელიც არ არის ერთჯერადი, სანამ კრიზისი არ მოგვარდება, ევროკავშირი ამ პროცესში ჩართული იქნება
ქართული პრესის მიმოხილვა 01.03.2021
ქართული კონსტიტუციის 100 წლისთავთან დაკავშირებით კავკასიის საერთაშორისო უნივერსიტეტი სამეცნიერო კრებულს ამზადებს
ევროპის გუნდი: ლიბერთი ბანკისთვის უზრუნველყოფილი დამატებითი დახმარებით, COVID-19-ის კრიზისის დასაძლევად  ევროპის საინვესტიციო ბანკის მიერ მიკრო, მცირე და საშუალო საწარმოების მხარდაჭერა ახალ ეტაპზე გადადის
"მაგნიტის" ყოველდღიური 20%-იანი აქცია უფრო მრავალფეროვანი ხდება
სამომხმარებლო სესხი 3-თვიანი სრული საშეღავათო პერიოდით - ტერაბანკის ახალი აქცია
ბაკურიანში საერთაშორისო სათხილამურო ფედერაციის ეგიდით მსოფლიო თასის ეტაპი სკი კროსში დასრულდა