მარინა ეზუგბაიას განცხადებით, ინფექციურ საავადმყოფოში კოვიდინფიცირებული 3 ადამიანის მდგომარეობა მძიმეა

ინფექციური საავადმყოფოს სამედიცინო დირექტორის მარინა ეზუგბაიას განცხადებით, ინფექციურ საავადმყოფოში მყოფი კოვიდინფიცირებული 3 პაციენტის ჯანმრთელობის მდგომარეობა მძიმეა. როგორც ეზუგბაიამ ჟურნალისტებს განუცხადა, დანარჩენი პაციენტების ჯანმრთელობის მდგომარეობა საშუალო და მსუბუქი სიმძიმისაა.

„ჩვენ კლინიკაში გამოჯანმრთელებული გუშინ არ გვყოლია. შემოვიდა 8 ახალი დადასტურებული შემთხვევა. ამ 8 ახალი შემთხვევიდან 5-ის წყარო არის ლილოს ბაზრობიდან, 2 არის გაჩიანიდან და 1 სამედიცინო პერსონალი. 38 პაციენტში 2 მძიმე რჩებოდა და გუშინდელი შემოსულიდან კიდევ ერთი მძიმე პაციენტი დაგვემატა. სამივეს მდგომარეობა დინამიკაში არ უარესდება, სტაბილურია. გამოსავალის პროგნოზი კეთილსაიმედო იქნება. დანარჩენების მდგომარეობა საშუალო და მსუბუქი სიმძიმისაა“,- განაცხადა ეზუგბაიამ.

მისი თქმით, არ აქვს მნიშვნელობა ინფიცირების ახალი შემთხვევების რაოდენობა რამდენი იქნება, რადგან „კოვიდი არ წასულა ქვეყნიდან“.

„კოვიდი რჩება ქვეყანაში, არ აქვს მნიშვნელობა ახალი დადასტურებული 19 იქნება თუ ერთი. რეგულაციები, რომელიც არის, შესრულება უნდა. უნდა წარმოებდეს დისტანცირება, სადაც შეიძლება, თუ დისტანცირება შეუძლებელია, პირბადეები უნდა გვეკეთოს, აუცილებელია ჰიგიენის დაცვა და თავი უნდა შევიკავოთ თავყრილობისგან“,- განაცხადა ეზუგბაიამ.

ცნობისთვის, საქართველოში კორონავირუსის 19 ახალი შემთხვევა გამოვლინდა და ჯამში, ინფიცირებულთა რაოდენობა 1104-მდე გაიზარდა.

რაც შეეხება გამოჯანმრთელებულებს, მათი რიცხვი 1-ით გაიზარდა და 912-ს შეადგენს.