რობერტ კოხის ინსტიტუტის ხელმძღვანელი ლოთარ ვილერი გერმანიაში კორონავირუსით ინფიცირების შემთხვევების მატების გამო შეშფოთებას გამოთქვამს და მოსახლეობას პირბადეების ტარებისა და სოციალური დისტანციის დაცვისკენ მოუწოდებს.

„ძალიან შეშფოთებული ვარ. სწრაფად განვითარებადი პანდემიის შუა გზაზე ვიმყოფებით. ადამიანებს მოვუწოდებთ, პირბადეები ატარონ და პატივი სცენ სოციალური დისტანციისა და ჰიგიენის წესებს“, - აღნიშნა ლოთარ ვილერმა.

მისივე თქმით, ჯერჯერობით რთულია დაზუსტებით იმის თქმა, დაიწყო თუ არა გერმანიაში კორონავირუსის მეორე ტალღა, თუმცა შესაძლებელია ეს ასეც იყოს.

„ჯერჯერობით არ ვიცით, არის თუ არა ეს მეორე ტალღის დასაწყისი, მაგრამ შესაძლებელია, იყოს კიდეც. თუმცა ოპტიმისტურად ვარ განწყობილი და მიმაჩნია, რომ თუკი ჰიგიენის წესებს დავიცავთ, მის აღკვეთას შევძლებთ“, - განაცხადა რობერტ კოხის ინსტიტუტის ხელმძღვანელმა.

ცნობისათვის, გერმანიაში, გასული დღე-ღამის განმავლობაში, კორონავირუსის 633 ახალი შემთხვევა დადასტურდა და დაინფიცირებულთა საერთო რაოდენობამ 207 000-ს გადააჭარბა. ქვეყანაში „კოვიდ 19“-ს, საერთო ჯამში, 9 206 ადამიანი ემსხვერპლა.