ლიბანის დედაქალაქ ბეირუთში მომხდარი ძლიერი აფეთქების შედეგად 200 000-დან 250 000-მდე ადამიანი უსახლკაროდ დარჩა, - უცხოური მედიის ინფორმაციით, ამის შესახებ ბეირუთის გუბერნატორმა მარუან აბუდმა განაცხადა.
მისივე თქმით, ხელისუფლებას უსახლკაროდ დარჩენილები თავშესაფრებში გადაჰყავს და წყლითა და საკვებით ამარაგებს.
გუბერნატორი აცხადებს, რომ აფეთქებისგან მიყენებული ზარალი 3-5 მილიარდ დოლარს შეადგენს.
„ბეირუთის სახანძრო სამსახურის 10 წევრი დავკარგეთ. რაც შეეხება მატერიალურ ზარალს, ის 3-5 მილიარდი დოლარი, ან შეიძლება მეტიცაა,“- განაცხადა მარუან აბუდმა.
შეგახსენებთ, ბეირუთში გუშინ მომხდარი ძლიერი აფეთქების შედეგად დაღუპულთა რაოდენობა 100-მდე, ხოლო დაშავებულთა რიცხვი 4 000-მდე გაიზარდა. ლიბანის ოფიციალური პირები მომხდარს ასაფეთქებელი ნივთიერებების საწყობს უკავშირებენ.
ქვეყნის პრეზიდენტმა მიშელ აუნმა სოციალურ ქსელ „ტვიტერში“ განცხადება გაავრცელა, სადაც აღნიშნულია, რომ 2 750 ტონა ამონიუმის ნიტრატის საწყობში, უსაფრთხოების ნორმები დაცული არ იყო. პრეზიდენტმა დღეისთვის მთავრობის საგანგებო სხდომა დანიშნა და განაცხადა, რომ ქვეყანაში 2-კვირიანი საგანგებო მდგომარეობა გამოცხადდება.