ბაჩანა ლობჟანიძის განცხადებით, შსს-ში გამოკითხვაზე დღესაც მივა
ბაჩანა ლობჟანიძე, რომელიც თავს გარდაცვლილი პროგრამისტის, 23 წლის თამარ ბაჩალიაშვილის შეყვარებულს უწოდებს, შინაგან საქმეთა სამინისტროში გამოკითხვაზე დღესაც მივა. აღნიშნულის შესახებ „ინტერპრესნიუსს“ თავად ლობჟანიძემ განუცხადა.
ლობჟანიძის თქმით, ის უწყებაში დამატებითი ინფორმაციის მისაწოდებლად დღეს, 10:00 საათზე მივა. მისივე განმარტებით, გუშინ მისი გამოკითხვა ვერ მოხერხდა.
როგორც ის აცხადებს, გუშინ შსს-ში ასევე იმყოფებოდა მარიამ ვარდიაშვილიც.
ცნობისთვის, როგორც მან „ინტერპრესნიუსს“ და „პალიტრავიდეოს“ განუცხადა, სოციალური ქსელების გამოყენებით, ის საქმის დამოუკიდებლად გამოძიებას ცდილობს. მისი კუთვნილი მობილური ტელეფონის დაბრუნების შემდეგ კი ის თამარ ბაჩალიაშვილთან მიმოწერასა და ერთობლივად გადაღებული ფოტო-ვიდეოების გასაჯაროებასაც გეგმავს.
მისივე თქმით, თამარ ბაჩალიაშვილი მას ფიზიკურად 19 ივნისის შემდეგ არ უნახავს, რადგან ბაჩალიაშვილს კომპანია „ზეგიდან“ წამოსვლამდე გარკვეული ვალდებულებების შესასრულებლად დრო სჭირდებოდა.
v-if="article.gallery" v-html="article.gallery"
