ნებისმიერი ამომრჩევლის მიერ, თუნდაც ჩვენი პარტიისთვის სრულიად მიუღებელი პოლიტიკური ძალის სასარგებლოდ გაკეთებული არჩევანი და მიცემული ხმა, უნდა იყოს დაცული, რაც არის საფუძველი არჩევნებზე ნების თავისუფალი გამოხატვისა,- ამის შესახებ განცხადებას პარტია „ჩვენი საქართველო - სოლიდარობის ალიანსი“ ავრცელებს.
მათივე განცხადებით, უკლებლივ ყველა პარტიისთვის ეს უნდა წარმოადგენდეს მორალითა და დემოკრატიის უნივერსალური პრინციპებით ნაკარნახევ ვალდებულებას და არა შეთანხმების შედეგად ერთმანეთის მიმართ აღებულ პასუხისმგებლობას. აქედან გამომდინარე პარტიაში მემორანდუმზე ხელმოწერის აუცილებლობას ვერ ხედავენ.
„პირობას ვდებთ უპირველეს ყოვლისა ქართული საზოგადოებისა და ამომრჩეველის წინაშე, რომ ჩვენ ბოლომდე დავიცავთ არა მხოლოდ ჩვენი პარტიის ამომრჩევლის ხმებს, არამედ საქართველოს ნებისმიერი მოქალაქის არჩევანს. კიდევ ერთხელ ხაზს ვუსვამთ, მიუხედავდ იმისა თუ რაოდენ მიუღებელიც არ უნდა იყოს ჩვენთვის ის პოლიტიკური ძალა, რომელთაც მათ დაუჭირეს მხარი,“- განაცხადეს პარტია „ჩვენი საქართველო - სოლიდარობის ალიანსში“.
ცნობისთვის, 30-მდე ოპოზიციური პარტია დღეს ლეიბორისტული პარტიის ოფისში დეკლარაციას გააფორმებს. ოპოზიციის წარმომადგენლები თანხმდებიან, რომ არჩევნებში გამარჯვების შემთხვევაში „ქართულ ოცნებასთან“ კოალიციას არ შექმნიან.
„ევროპული საქართველოს“ წევრის ლევან თარხნიშვილის განცხადებით, დეკლარაციას ის პარტიები მოაწერენ ხელს, რომლებიც ლეიბორისტების ოფისში იკრიბებიან.