პროკურორი დავით გუმბერიძე აცხადებს, რომ თამარ ბაჩალიაშვილის გარდაცვალების მიზეზის დასადგენად სასამართლო-სამედიცინო ექსპერტიზაა დანიშნული.
როგორც მან პროკურატურაში გამართულ ბრიფინგზე აღნიშნა, საქმეზე სრულყოფილი გამოძიება ტარდება.
„ჯერ კიდევ ექსპერტიზის დასკვნები უნდა მივიღოთ გარკვეულ საკითხებთან დაკავშირებით, ჯერ კიდევ ხდება მოწმეთა ბაზის დაკითხვა, ამ ყველაფრის ამოწურვის შემდეგ მივიღებთ შესაბამის სამართლებრივ გადაწყვეტილებას“, - განაცხადა პროკურორმა.
მისივე თქმით, თამარ ბაჩალიაშვილის დნმ-ის გარდა ბაჩალიაშვილის ავტომობილში ან ამოღებულ ნივთებზე სხვა პირის დნმ არ ფიქსირდება.
„ექსპერტიზით დადგენილია ეს ფაქტიც, სხვა უცხო პირის გენეტიკური პროფილის, დნმ-ის შემცველი რაიმე ინფორმაცია ავტომანქანაში ან ამოღებულ საგნებზე არ ფიქსირდება, ესაა დასკვნით დადასტურებული “,- განაცხადა პროკურორმა.