მიხეილ ჩხენკელმა თსუ-ს საერთაშორისო აკრედიტაციის მქონე პროგრამების პრეზენტაციაში მიიღო მონაწილეობა

საქართველოს განათლების, მეცნიერების, კულტურისა და სპორტის მინისტრმა მიხეილ ჩხენკელმა ივანე ჯავახიშვილის სახელობის თბილისის სახელმწიფო უნივერსიტეტში საერთაშორისო აკრედიტაციის მქონე პროგრამების პრეზენტაციაში მიიღო მონაწილეობა. ამის შესახებ „ინტერპრესნიუსს“ განათლების, მეცნიერების, კულტურისა და სპორტის სამინისტროდან აცნობეს.

მათი ინფორმაციით, რეგიონში პირველად თსუ-ს ორმა პროგრამამ ამერიკის ინჟინერიისა და ტექნოლოგიების სააკრედიტაციო საბჭოს (ABET) აკრედიტაცია მიიღო. ღონისძიებას აშშ-ს ელჩის მოადგილის მოვალეობის შემსრულებელი საქართველოში ქეთრინ შვაიცერი და აკადემიური წრეების წარმომადგენლები ესწრებოდნენ.

ღონისძიებაზე მიხეილ ჩხენკელმა საზოგადოებას სიტყვით მიმართა და საქართველოს უმაღლესი განათლების სისტემის ინტერნაციონალიზაციის თვალსაზრისით საერთაშორისო აკრედიტაციის მქონე პროგრამების მნიშვნელობაზე ისაუბრა.

„მოხარული ვარ, რომ მაქვს შესაძლებლობა, მივულოცო თბილისის სახელმწიფო უნივერსიტეტს ორი საგანმანათლებლო პროგრამის ამერიკის ინჟინერიისა და ტექნოლოგიების სააკრედიტაციო საბჭოს (ABET) აკრედიტაციის მიღება, რაც დიდი მიღწევაა საქართველოს აკადემიური სივრცისათვის. ჩვენი მისწრაფებაც სწორედ ეს არის, რომ ყველა პროგრამა შეესაბამებოდეს საერთაშორისო სტანდარტს და მათი კურსდამთავრებულები იყვნენ კონკურენტუნარიანები მსოფლიო მასშტაბით. საქართველოს განათლების, მეცნიერების, კულტურისა და სპორტის სამინისტრო ყოველთვის დაუჭერს მხარს ამგვარ მნიშვნელოვან აკადემიურ ინიციატივებს.

აქვე მინდა ვისარგებლო შემთხვევით და გულითადი მადლობა გადავუხადო ამერიკის შეერთებული შტატების მთავრობას მრავალწლიანი მხარდაჭერისა და ნაყოფიერი თანამშრომლობისათვის საქართველოს განათლების სისტემის გაძლიერების კუთხით”, - განაცხადა მიხეილ ჩხენკელმა.

„ABET-ის აკრედიტაცია მიიღო ორმა პროგრამამ: ელექტრული და ელექტრონული ინჟინერია და კომპიუტერული მეცნიერებები. შესაბამისად, ამ პროგრამების კურსდამთავრებულები საერთაშორისო აღიარების მქონე დიპლომს მიიღებენ, რომელიც მსოფლიოს ნებისმიერ ქვეყანაში არის კონკურენტუნარიანი.

აღსანიშნავია, რომ თსუ არის პირველი უნივერსიტეტი ABET-ის ისტორიაში, რომელმაც პირველივე ჯერზე მიიღო ამერიკული აკრედიტაცია. თსუ-ს საბაკალავრო პროგრამა ქიმიაში პირველია საქართველოში, რომელმაც ამერიკის ქიმიური საზოგადოების (ACS) სერტიფიცირება მიიღო. საქართველო 24-ე ქვეყანაა, სადაც ACS-ის წარმომადგენლობა გაიხსნა.

პრეზენტაციის დასრულების შემდეგ თსუ რექტორმა გიორგი შარვაშიძემ პროგრამების საერთაშორისო აღიარებაში შეტანილი წვლილისათვის თსუ-ს აკადემიური და ადმინისტრაციული პერსონალი უნივერსიტეტის მედლებითა და მადლობის სიგელებით დააჯილდოვა”, - აღნიშნულია ინფორმაციაში.

პატრიარქის სააღდგომო ეპისტოლე
ქართული პრესის მიმოხილვა 05.05.2021
ალექსანდრე თვალჭრელიძე - მეჩვენება, რომ სააკაშვილი „ნაცმოძრაობის“ ტანზე მიბმული ლოდია, რომელიც მას ფსკერისკენ მიაქანებს
ნიკოლოზ მეტრეველი - ჩინეთი აღარ იმალება და იცდის
სინერჯი ჯგუფი კერძო კაპიტალის ოპერაციებში მონაწილეობისთვის (LBO) იურიდიულ პირებს იწვევს