ზუგდიდში “ევროპული საქართველოს“ მაჟორიტარობის კანდიდატი გიგი უგულავა მის კონკურენტს “ნაციონალური მოძრაობიდან“ მალხაზ ჯალაღონიას კონკურენტად არ თვლის და ამბობს, რომ კონკურენტი ბიძინა ივანიშვილი და “ქართული ოცნებაა“.
“ვერ გეტყვით, რომ ის კარგად გავიცანი. სხვათა შორის გუშინ ქალაქის ცენტრში შემხვდა. ერთადერთი, მისი საჯარო გამოსვლებიდან შემიძლია ვთქვა, რომ ის ამ შემთხვევაში ნომრის კანდიდატია. ყველა კითხვას პასუხობს: - არ ვიცი, ჰკითხეთ პარტიას“, - განაცხადა უგულავამ “პალიტრანიუსის“ გადაცემა "ნიუსრუმში".
აქვე მან აღნიშნა, რომ სწორი იქნებოდა როგორც ზუგდიდში, ასევე ყველა სხვა საარჩევნო ოლქში ოპოზიციას საერთო მაჟორიტარობის კანდიდატი ჰყოლოდა და არჩევნები პირველივე ტურში მოეგო.
“სამწუხაროდ, ახლა კონკურენცია გვიწევს. ამის მიუხედავად, ბატონ მალხაზს ჩემს კონკურენტად არ ვთვლი. რა თქმა უნდა, კონკურენტია ბიძინა ივანიშვილი, “ქართული ოცნება“ და პრობლემები, რაც “ქართულმა ოცნებამ“ ქვეყანაში შექმნა. ვფიქრობ, რომ იქნება არჩევნების მეორე ტური ჩემსა და ირაკლი ჩიქოვანს შორის“, - აღნიშნა გიგი უგულავამ.