პარტია „მოქალაქეების“ ლიდერი ალეკო ელისაშვილი მიიჩნევს, რომ რიგგარეშე არჩევნები უნდა ჩატარდეს და ის უნდა ჩაატაროს პატიოსანმა ცენტრალურმა საარჩევნო კომისიამ და „არა იმ გამყალბებელმა სტრუქტურამ, რომელიც ახლა არსებობს“. მისივე განცხადებით, ის ოპოზიციური პარტიები, რომლებმაც 5%-იანი ბარიერი გადალახეს, პარლამენტში არ უნდა შევიდნენ.

„ორი რამ ვიცი - ერთი, რომ უნდა ვიბრძოლოთ. ბრძოლა უნდა იყოს შეურაცხყოფაზე პასუხი, ვინაიდან გუშინ არჩევნები არ ჩატარებულა, გუშინ იყო შეურაცხყოფა ყველასი. ცენტრალური საარჩევნო კომისია და „ქართული ოცნება“ ერთობლივად, დაგეგმილად გვაყენებდნენ შეურაცხყოფას. ამაზე ბრძოლით უნდა გავცეთ პასუხი და მეორე არის ის, რომ ოპოზიცია არ უნდა შევიდეს პარლამენტში და არ უნდა შეუქმნას ლეგიტიმაცია. ეს არის ძალიან მნიშვნელოვანი. რიგგარეშე არჩევნები უნდა იყოს და რიგგარეშე არჩევნები უნდა ჩაატაროს პატიოსანმა ცენტრალურმა საარჩევნო კომისიამ და არა იმ სამარცხვინო გამყალბებელმა სტრუქტურამ, რომელიც გვაქვს. ეს არის მთავარი მიზანი და ამისთვის უნდა ვიბრძოლოთ“, - განაცხადა ელისაშვილმა.