ფილიპინების დედაქალაქ მანილაში ტაიფუნ „ვამკოს“ სულ მცირე 7 ადამიანის სიცოცხლე ემსხვერპლა. ამის შესახებ ინფორმაციას Reuters-ი ავრცელებს.

სააგენტოს ცნობით, ქარის სიჩქარემ ზოგ ადგილებში 255 კილომეტრი/საათში მიაღწია.

სტიქიის გამო მანილაში ფრენები გადაიდო, მუშაობა შეაჩერა პორტმა, დაიხურა ფინანსური ბაზრები.

გავრცელებული ინფორმაციით, დედაქალაქსა და მის შემოგარენში 3 მილიონამდე ადამიანი ელექტროენერგიის გარეშე დარჩა.

ქვეყნის სტიქიასთან ბრძოლის სააგენტოში აცხადებენ, რომ ტაიფუნმა 36 ქალაქის ნაწილობრივი დატბორვა გამოიწვია.