„ჯორჯიან უოთერ ენდ ფაუერი“ და „რუსთავის წყალი“ ტარიფების ცვლილებას ეხმაურება.
"საქართველოს ენერგეტიკისა და წყალმომარაგების მარეგულირებელი კომისიის მიერ მიღებული გადაწყვეტილება წყალმომარაგების ტარიფის მატების შესახებ საშუალებას მოგვცემს, შევინარჩუნოთ წყალმომარაგების სტაბილურობა და ხარისხი, თუმცა, კომისიის მიერ დადგენილი სატარიფო ცვლილება გარკვეულწილად ზღუდავს კომპანიებს განვითარების გეგმებსა და სამომავლო ინვესტიციებში, რაც კიდევ უფრო გააუმჯობესებდა მომსახურების ხარისხს და კომპანიების შემდგომ განვითარებას. აღსანიშნავია, რომ „ჯორჯიან უოთერ ენდ ფაუერმა“ და „რუსთავის წყალმა“ 2018-2020 წლებში მნიშვნელოვანი ინვესტიციები განახორციელეს, როგორც წყალმომარაგების სისტემის განახლების, ასევე განვითარების მიმართულებით, რაც დადებითად აისახა თბილისის, მცხეთისა და რუსთავის წყალმომარაგებაზე. სარეაბილიტაციო პროექტები სამ ქალაქში 400-ზე მეტ ქუჩაზე განხორციელდა, სადაც 300 კმ სიგრძის წყალსადენისა და წყალარინების ქსელი განახლდა. კომპანიები დღეისათვის სტაბილური წყალმომარაგებითა და მაღალი ხარისხის სასმელი წყლით 600 000-ზე მეტ მომხმარებელს უზრუნველყოფენ და 6600 კმ წყალსადენის ქსელს ემსახურებიან,"- აღნიშნულია კომპანიის მიერ გავრცელებულ ინფორმაციაში.