აშშ-მა სამ ჩრდილოეთ კორეელ პროგრამისტს მასობრივი ჰაკერული თავდასხმის განხორციელებაში დასდო ბრალი

შეერთებულმა შტატებმა სამ ჩრდილოეთ კორეელ პროგრამისტს ბრალი მასობრივი ჰაკერული თავდასხმის განხორციელებაში დასდო, რისი მიზანიც, საერთო ჯამში, 1.3 მილიარდ დოლარზე მეტი ფულისა და კრიპტოვალუტის მოპარვა იყო, - Reuters-ის ინფორმაციით, ამის შესახებ აშშ-ის იუსტიციის დეპარტამენტმა განაცხადა.

მათივე ინფორმაციით, ჰაკერების სამიზნე სხვადასხვა ქვეყნების ბანკები და კომპანიები იყვნენ.

ბრალდების ოქმში აღნიშნულია, რომ აღნიშნულმა სამმა პირმა ფული ჰაკერული თავდასხმის გზით მაშინ მოიპარა, როდესაც ჩრდილოეთ კორეის სამხედრო სადაზვერვო სამსახურისთვის მუშაობდა.

Reuters-ი წერს, რომ ჰაკერების მიერ მოპარული ფულის საერთო ოდენობა უცნობია, თუმცა, როგორც ჩანს, რაოდენობა სერიოზულია, ვინაიდან მხოლოდ 2016 წელს და მხოლოდ „ბანგლადეშის ბანკიდან“, ჰაკერებმა, სავარაუდოდ, 81 მილიონი აშშ დოლარი მოიპარეს.

მხოლოდ 2016 წელს, მხოლოდ ბანგლადეშის ბანკში, ჰაკერებმა 81 მილიონი დოლარი გამოიმუშავეს.

”ჩრდილოეთ კორეის ჯაშუშები, კლავიშების გამოყენებით და არა იარაღით, ნაღდი ფულის ტომრების ნაცვლად კრიპტოვალუტის ციფრული საფულეების მოპარვით, მსოფლიოს 21-ე საუკუნის წამყვანი ბანკის მძარცველები არიან”, - განაცხადა აშშ-ის გენერალური პროკურორის თანაშემწემ ჯონ დემერსმა.

აშშ-ის სახელმწიფო დეპარტამენტის პრესსპიკერმა ნედ პრაისმა კი აღნიშნა, რომ ჩრდილოეთ კორეის მავნე კიბერ ქმედებები შეერთებულ შტატებსა და მის მოკავშირეებს ემუქრება და ამ საკითხს ჯო ბაიდენის ადმინისტრაცია ჩრდილოეთ კორეის მიმართ აშშ-ის პოლიტიკის განსახილველ საკითხებს შორის შეიტანს.

გაეროს 2019 წლის ანგარიშის თანახმად, ჩრდილოეთ კორეამ, კრიპტოვალუტის ბირჟებსა და ბანკებზე განხორციელებული კიბერ თავდასხმების შედეგად, საერთო ჯამში, 2 მილიარდი აშშ დოლარი შეაგროვა.