საქართველოს განათლებისა და მეცნიერების მინისტრმა მიხეილ ჩხენკელმა მონაწილეობა მიიღო UNESCO-ს მიერ ორგანიზებულ ონლაინ მინისტერიალში, რომლის მთავარ მიზანს მსოფლიოში პანდემიად გამოცხადებული კორონავირუსის გავრცელებიდან ერთი წლის თავზე ქვეყნების მიერ განათლების უწყვეტობისა და ტრანსფორმაციის კუთხით გადადგმული ნაბიჯებისა და სამომავლო გეგმების გაზიარება წარმოადგენდა.

მინისტერიალი UNESCO-ს გენერალურმა დირექტორმა ოდრი აზულაიმ გახსნა და აღნიშნა, რომ პანდემიის დაწყების დღიდან გაერთიანებული ერების განათლების, მეცნიერებისა და კულტურის ორგანიზაციამ ხელი შეუწყო პოლიტიკურ დიალოგსა და გამოცდილების გაზიარებას, რითაც ქვეყნებს გამოწვევების დასაძლევად დიდი დახმარება გაუწია.

„ჩემთვის დიდი პატივია, მონაწილეობა მივიღო UNESCO-ს მიერ ორგანიზებულ მინისტერიალში. პანდემიის დაწყებიდან ერთი წლის თავზე შეგვიძლია ვთქვათ, რომ Covid-19-ით გამოწვეული კრიზისი დიდი გამოწვევა აღმოჩნდა თითქმის ყველა სახელმწიფოსთვის და, ამავდროულად, უბიძგა განათლების სისტემებს, დაენერგათ ინოვაციური მიდგომები, გამოეყენებინათ თანამედროვე ტექნოლოგიები. კრიზისმა ასევე თვალნათლივ დაგვანახა გლობალური თანამშრომლობის აუცილებლობა და მნიშვნელობა“, - აღნიშნა მიხეილ ჩხენკელმა.

მინისტრმა აღნიშნა, რომ კრიზისის მართვის პროცესში საქართველოს განათლების სისტემამ წარმატებით შეძლო ახალ რეალობასთან ადაპტაცია და დისტანციურ ფორმატში გადასვლა. დაჩქარებულ რეჟიმში შეიქმნა მრავალფეროვანი ონლაინ რესურსები. აღსანიშნავია პირველ არხთან თანამშრომლობით დაწყებული საგანმანათლებლო პროექტი „ტელესკოლა“, სადაც გაკვეთილები ეთნიკური უმცირესობების ენებზეც ტარდება. ყველა გაკვეთილი ადაპტირებულია ჟესტურ ენაზე.

მიხეილ ჩხენკელის თქმით, სასწავლო პროცესის წარმატება დიდწილად დამოკიდებულია განათლების ციფრულ ტრანსფორმაციაზე და, ზოგადად, ტექნოლოგიის მზარდ როლზე. ახალგაზრდებში 21-ე საუკუნის უნარ-ჩვევების განვითარების მიზნით, საქართველოს სკოლებში აქტიურად მიმდინარეობს კორპორაცია Microsoft-ის საგანმანათლებლო პროგრამის Minecraft Education Edition დანერგვის პროცესი, რაც სრულად პასუხობს თანამედროვე პედაგოგიურ მიდგომას.

მინისტრმა ხაზი გაუსვა, რომ საქართველოს ძალისხმევა და წარმატება დისტანციური სწავლების დანერგვის საქმეში აღიარებს საერთაშორისო ორგანიზაციებმაც. ეკონომიკური თანამშრომლობისა და განვითარების ორგანიზაციამ (OECD), საქართველოს მთავრობის მიერ გადადგმული ნაბიჯები 98 ქვეყანას შორის საუკეთესო მაგალითად დაასახელა. საქართველოს საპასუხო ზომებს ასევე მაღალი შეფასება მისცეს კორპორაცია Microsoft-მა და UNICEF-მა.

მიხეილ ჩხენკელმა აღნიშნა, რომ დღეს, მთელი საქართველოს მასშტაბით, საგანმანათლებლო პროცესი საკლასო ოთახებში მიმდინარეობს ჯანდაცვის სფეროს რეკომენდაციების მკაცრი დაცვით. მისი თქმით, COVID-19-ით გამოწვეულმა პანდემიამ დააჩქარა ცვლილებები, შექმნა ახალი დღის წესრიგი და განათლების სისტემას მისცა ბიძგი, გაზარდოს ICT-ის გამოყენება სწავლების პროცესში, დანერგოს მეტი ინოვაცია და გამოიყენოს ყველა ის ინსტრუმენტი, რომელიც განათლებას გაცილებით ინკლუზიურს გახდის.

UNESCO-ს მიერ ორგანიზებულ მინისტერიალში მონაწილეებს სიტყვით მიმართეს გაერთიანებული ერების ორგანიზაციის გენერალურმა მდივანმა, მსოფლიოს სხვადასხვა ქვეყნის მინისტრებმა, ჯანდაცვის მსოფლიო ორგანიზაციის, გაერთიანებული ერების განათლებისა და მეცნიერების სფეროს წარმომადგენლებმა და ჰარვარდის უნივერსიტეტის პროფესორებმა.