მათი პოლიტიკური დღის წესრიგი ნიშნავს უპირობოდ რაღაცის ამოშანთვას, ვიღაცის უპირობოდ გაძევებას - ასეთ მდგომარეობაში ნებისმიერი საღი აზრის გამოვლინებაც კი დასჯადია, - ასე ეხმიანება საპარლამენტო უმრავლესობის წევრი ირაკლი ქადაგიშვილი ჟურნალისტებთან "ნაციონალური მოძრაობის" წევრის სალომე სამადაშვილის მიერ გაკეთებულ განცხადებას, რომ „სასაცილოდ და ინფანტილურად გამოიყურება ენმ-ის პოზიცია“ და ამ გაუგებრობაში მისი ადგილი აღარაა.

მისი თქმით, ფსიქოლოგიური ბულინგი, რომელიც მიმდინარეობს, რუსული ჰიბრიდული ომის ნაწილია.

"როცა საუბარია გარკვეული პარტიების მხრიდან, რომ მათი პოლიტიკური დღის წესრიგი ნიშნავს უპირობოდ რაღაცის ამოშანთვას, ვიღაცის უპირობოდ გაძევებას, უკიდურესად დესტრუქციული დღის წესრიგით ხელისუფლების ხელში ჩაგდებას, ასეთ მდგომარეობაში ნებისმიერი საღი აზრის გამოვლინებაც კი დასჯადია, დასჯადია ყველა იმ მეთოდით, რაც ხელთ უპყრიათ. გვესმის ფსიქოლოგიური ბულინგი ტელე ეკრანებიდან, პოლიტიკოსების და სამოქალაქო აქტივისტების მხრიდან , რაც არის რუსული ჰიბრიდული ომის მნიშვნელოვანი ნაწილი. შეთანხმება აქამდე რომ ვერ შედგა, საქართველომ ამდენი დრო რომ დაკარგა ბულინგის მოგერიებაში, სწორედ ამ ჰიბრიდული ომის მესვეურთა დამსახურებაა,"- განაცხადა ქადაგიშვილმა.

ცნობისათვის, გუშინ სალომე სამადაშვილმა შარლ მიშელის დოკუმენტს ხელი ინდივიდუალურად მოაწერა. მოგვიანებით მან აღნიშნა, რომ ენმ-ის პოზიცია სასაცილოდ და ინფანტილურად გამოიყურება და ამ გაუგებრობაში მისი ადგილი აღარაა.