ვასაძის განცხადებები ხშირად გამოირჩეოდა ისეთი რადიკალური ფორმებით, რომელიც ადამიანის უფლებების მიმართულებით თანამედროვეობის ღირებულებებთან არცთუ თავსებადია,- ასე გამოეხმაურა ჟურნალისტებთან საუბრისას ადამიანის უფლებათა კომიტეტის თავმჯდომარე მიხეილ სარჯველაძემ ბიზნესმენ ლევან ვასაძის პოლიტიკაში მოსვლის განცხადებას.
მისი თქმით, ვასაძის განცხადებები შესაძლოა მის პოლიტიკურ მსოფლმხედველობასთან დაკავშირებით გარკვეულ კითხვებს აჩენდეს.
„ზოგადად, პარტიას უნდა ახასითებდეს დეკლარირებული მიზნები, პოლიტიკური პლატფორმა, რომელსაც ემხრობა და ა.შ. კონკრეტული პიროვნების მიმართ განწყობა შეიძლება ვერ ასახავდეს სრულად პარტიის მიმართ დამოკიდებულებას, მაგრამ აქვე უნდა ვთქვათ, რომ ბატონი ვასაძის განცხადებები ხშირად გამოირჩეოდა ისეთი რადიკალური ფორმებით, რომელიც ადამიანის უფლებების მიმართულებით არცთუ თავსებადია თანამედროვეობის ღირებულებებთან. შესაბამისად, ეს პრობლემა შეიძლება ნამდვილად გარკვეულ კითხვებს აჩენდეს პოლიტიკურ მსოფლმხედველობასთან დაკავშირებით,"- განაცხადა სარჯველაძემ.
რაც შეეხება ვასაძის პრორუსულობას, მიხეილ სარჯველაძე აცხადებს, რომ ამ მხრივ პოლიტიკური პარტიის პლატფორმა და ხედვა როგორია, არ იცის, პიროვნებას ვერ შეაფასებს. თუმცა, როგორც აღნიშნავს, "მათი აზრები რომ განსხვავებულია, ფაქტია".
"ევროპული მომავალი არის ერთადერთი და უალტერნატივო გზა საქართველოსთვის. ამაზე მე პირადად განსხვავებული აზრის მოსმენის საჭიროებასაც ვერ ვხედავ. არაერთხელ განხილული თემაა. ყველას აქვს უფლება გამოხატოს განსხვავებული აზრი, მაგრამ მე პირადად არ მაქვს მიმღებლობა, რომ ამ მოსაზრებებს რამენაირად დავეთანხმო,"- განაცხადა სარჯველაძემ.