ბავშვზე ზრუნვის საერთაშორისო და ადგილობრივი წესები, მათ შორის მონიტორინგის შესაძლებლობაც, უპირობოდ ყველგან უნდა იყოს დაცული, არ აქვს მნიშვნელობა საეკლესიო დაწესებულებაა, სასულიერო თუ საერო,- ამის შესახებ პარლამენტის ვიცე-სპიკერმა დავით სერგეენკომ ჟურნალისტებთან ნინოწმინდის ბავშვთა პანსიონში განვითარებულ მოვლენებზე საუბრისას განაცხადა.
მისივე თქმით, ჯანდაცვის სამინისტროს სპეციალისტების დიდი ჯგუფი დაწესებულებაში მონიტორინგზე იმყოფება.
„რამდენიმე მნიშვნელოვანი მოცემულობაა. პირველი ის, რომ ბავშვზე ზრუნვის საერთაშორისო და ადგილობრივი წესები, მათ შორის მონიტორინგის შესაძლებლობაც, უპირობოდ ყველგან უნდა იყოს დაცული, არ აქვს მნიშვნელობა საეკლესიო დაწესებულებაა, სასულიერო თუ საერო.
დღეს, საბედნიეროდ, ჯანდაცვის სამინისტროს სპეციალისტების დიდი ჯგუფი მონიტორინგზეა შესული და ასრულებენ თავის მოვალეობას. ჩემი აზრით, ეს ვითარება აქამდე არ უნდა მისულიყო არც ერთ შემთხვევაში, მითუმეტეს, ის გაურკვეველი სიუჟეტები, რაც გადიოდა სხვადასხვა მედიაში, ეს სხვა ბავშვებს სტრესავს. უბრალოდ არ შეიძლება. კონსულტაციები უნდა აიღონ ამ ადამიანებმა, სანამ ასეთ ნაბიჯებს გადადგამენ. დღეს რაც ხდება, ვითარება აქამდე არ უნდა მისულიყო, უფრო ადრე უნდა მოგვარებულიყო.
ვფიქრობ, დღევანდელი მონიტორინგი მოგცემს შესაძლებლობას, მონიტორინგისთვის შევიდეს სახალხო დამცველი ან ვინმე სხვა, ვინც საჭირო იქნება, რათა შეასრულოს თავისი მოვალეობა",- აღნიშნავს სერგეენკო.