ხათუნა სამნიძე - "ქართული ოცნება" "კლანის" შენარჩუნებისთვის ყველაფერს გააკეთებს, მაგრამ ეს არავის შერჩენია

“რესპუბლიკური პარტიის“ თავმჯდომარე ხათუნა სამნიძე აცხადებს, რომ „ქართული ოცნება“ სასამართლოში ე.წ. კლანის შენარჩუნებისთვის ყველაფერს გააკეთებს. ამის შესახებ ხათუნა სამნიძემ „პალიტრანიუსის“ გადაცემაში „რეზიუმე“ ისაუბრა.

როგორც სამნიძე ამბობს, ოპოზიციის ერთიანობა მნიშნველოვანია, რათა „კლანმა“ ვერ შეძლოს უზენაესი სასამართლოს მოსამართლეების დანიშვნა.

„ქართული ოცნება“ ამას არ დათმობს - მაგრამ უახლოეს წარსულს გადავხედოთ, ეს არავის შერჩენია. არავის ეს თავის „კლანად“ არ შეუნარჩუნებია. პირველი, ვინც მომავალი ხელისუფლების მხარეს გადავა და მოემსახურება, „კლანი“ იქნება. ეს არ გვინდა, რომ მოხდეს, ამიტომ, ვიდრე შესაძლებლობა გვაქვს, რომ შარლ მიშელის დოკუმენტი, რომელიც ყველა საერთაშორისო დოკუმენტში აღინიშნა, რომ უნდა შესრულდეს, პროცესს ყველა ჩვენი პარტნიორი აკვირდება, გავაკეთოთ ყველაფერი, ოპოზიციის ერთობა ამ ნაწილში გადამწყვეტია, რომ „კლანმა“ ვერ შეძლოს უზენაესი სასამართლოს მოსამართლეების დანიშვნა“, - განაცხადა სამნიძემ.

მან შეცდომა უწოდა შარლ მიშელის მედიაციით მიღებულ დოკუმენტზე ხელის არმოწერასთან დაკავშირებით, „ერთიანი ნაციონალური მოძრაობის“ გადაწყვეტილებას. როგორც სამნიძე ამბობს, იმედს იტოვებს, რომ პარტია გადაწყვეტილებას გადახედავს და შეურთდება.