ემა ტუხიაშვილი - ეს კვირა დაიწყო სამარცხვინოდ და დასრულდა ტრაგიკულად - მედიის ხელყოფა არავის  შერჩენია, ეს იწვევს ერთ რამეს: მედია გამოდის და იკავებს ფრონტის წინა ხაზს

ეს კვირა დაიწყო სამარცხვინოდ და დასრულდა ტრაგიკულად - მედიის ხელყოფა არავის შერჩენია, ეს მხოლოდ იწვევს ერთ რამეს - მედია გამოდის თავისი მთავარი გამშუქებლის ფუნქციიდან და იკავებს ფრონტის წინა ხაზს, ხოლო როგორ მთავრდება ეს, ყველას კარგად უნდა ესმოდეს, ამიტომ მოემზადეთ გადამწყვეტი ბრძოლისთვის, - ამის შესახებ „პალიტრანიუსის“ გადაცემა „360 გრადუსის“ წამყვანმა ემა ტუხიაშვილმა პარლამენტის შენობის წინ მიმდინარე აქციაზე განაცხადა.

მისივე თქმით, ქართულმა საზოგადოებამ ვერ დაინახა ხელისუფლების მიერ აღებული პასუხისმგებლობა.

„რამდენი ჭირისუფალი ჰყოლია ლექსოს, რამდენი ჭირისუფალი ჰყოლია ნაცემ, შეურაცხყოფილ მედიას, რამდენი ჯარისკაცი ჰყოლია თავისუფლებისთვის მებრძოლ მედიას და მე იმედი მაქვს, რომ თითოეული ჩვენგანი ბოლომდე იქნება მედიის თავისუფლებისა და დამოუკიდებლობის სადარაჯოზე. ეს კვირა დაიწყო სამარცხვინოდ და დასრულდა ტრაგიკულად. მე ვნანობ, რომ მთელი კვირის განმავლობაში ჩვენ შევედით სახლებში, დავუბრუნდით ჩვენს სტუდიებს, გვეძინა ჩვენს სახლებში, ვიყავით ჩვენს შვილებთან ერთად - არა, ჩვენ ეს ერთი კვირა დავკარგეთ. ჩვენ ამ ერთი კვირის განმავლობაში აქ უნდა ვმდგარიყავით თითოეული ჩვენი გალახული, შეურაცხყოფილი ჟურნალისტის უფლებების დასაცავად. რატომ გვჭირდება ჩვენ ყოველთვის მსხვერპლი იმისათვის, რომ დავინახოთ, რა არის სწორი და რა არის მრუდე, რა არის სიმართლე და სად არის ტყუილი? - ჩვენ ხომ ვერ დავინახეთ ამ ერთი კვირის განმავლობაში ვერც ერთი რეალურად დასჯილი დამნაშავე. ჩვენ ვერ დავინახეთ ხელისუფლების მიერ აღებული პასუხისმგებლობა. მედიის ხელყოფა არავის შერჩენია, ეს მხოლოდ იწვევს ერთ რამეს - მედია გამოდის თავისი მთავარი გამშუქებლის ფუნქციიდან და იკავებს ფრონტის წინა ხაზს, ხოლო როგორ მთავრდება ეს, ყველას კარგად უნდა ესმოდეს, ამიტომ მოემზადეთ გადამწყვეტი ბრძოლისთვის“, - განაცხადა ემა ტუხიაშვილმა.

შეგახსენებთ, რომ “ტვ პირველის” ოპერატორი, ლექსო ლაშქარავა გარდაიცვალა. ლაშქარავას 5 ივლისს "თბილისი პრაიდის" მოწინააღმდეგეები ფიზიკურად გაუსწორდნენ. ამ წუთებში პარლამენტთან მთავრობის გადადგომის მოთხოვნით საპროტესტო აქცია მიმდინარეობს.

უკრაინაში შედგენილ სასანქციო სიაზე მომუშავე ჯგუფის წევრი სვეტლანა მუსიიაკა - სიაში დღეისთვის 19 ათასი ადამიანია, თუმცა ეს საწყისი ეტაპის სამუშაოა და სანქციებზე საბოლოო გადაწყვეტილება დამოკიდებული იქნება უსაფრთხოების საბჭოსა და შემდეგ უკვე პრეზიდენტზე
ქართული პრესის მიმოხილვა 29.09.2022
ვანო მაჭავარიანი -  თუ ხელისუფლებამ არ იაქტიურა, იყოს უკრაინა-მოლდოვა- საქართველოს სამეულის ნაწილი, ჩვენ აღმოვჩნდებით უკრაინა-მოლდოვას ევროპული და ატლანტიკური მომავლის მიღმა, რაც ქვეყნისთვის კატასტროფა იქნება
„ფარმადეპოში“ თურქული მედიკამენტების ასორტიმენტი გაიზარდა
ბაზისბანკის მხარდაჭერით, ფონდ "ნატვრის ხის" საქველმოქმედო კონცერტი გაიმართა
VISA-ს და „ბიბლუსის“ ერთობლივი შეთავაზება მომხმარებელს - 30%-იანი ფასდაკლება სრულ ასორტიმენტზე
კომპანია FINA-ს წარმატების ისტორია - 11 წელი ბაზარზე
ტერაბანკისა და სააგენტოს „აწარმოე საქართველოში“ ხელშეწყობით, კახეთში სასტუმრო „ისევ ყვარელი“ განახლდა