თბილისის საქალაქო სასამართლოში „რუსთავი 2“-ისა და „ტვ პირველის“ ოპერატორებზე ძალადობის ფაქტებზე ბრალდებულების სასამართლო პროცესი მიმდინარეობს

თბილისის საქალაქო სასამართლოში „თბილისი პრაიდის“ საწინააღმდეგო აქციის დროს, „რუსთავი 2“-ისა და „ტვ პირველის“ ოპერატორებზე ძალადობის ფაქტებზე ბრალდებულების უშანგი დათუნაშვილისა და ირაკლი წიგნაძის სასამართლო პროცესი მიმდინარეობს.

სასამართლო ბრალდებულების მიმართ აღკვეთი ღონისძიების შეფარდებაზე მსჯელობს.

პროკურატურა დაკავებულებისთვის ყველაზე მძიმე აღკვეთი ღონისძიების სახის - პატიმრობის შეფარდებას ითხოვს, დაცვის მხარე კი სასამართლო პროცესზე გირაოს გამოყენების შუამდგომლობის დაყენებას აპირებს - „ტვ პირველის”- ოპერატორის მიმართ ძალადობაში ბრალდებულის ირაკლი წიგნაძის ადვოკატი 2000-ლარიანი გირაოს შეფარდებას მოითხოვს, „რუსთავი 2“- ის ოპერატორზე ძალადობისთვის დაკავებული უშანგი დათუნაშვილის უფლებადამცველი ასევე 2000-ლარიანი გირაოს გამოყენების შუამდგომლობას დააყენებს.

დათუნაშვილის ადვოკატის, ნიკოლოზ მჟავანაძის განცხადებით, მისი დაცვის ქვეშ მყოფი თავს დამნაშავედ არ ცნობს.

„სასამართლოს შევთავაზებთ გირაოს და იმედი გვაქვს, დაკმაყოფილებული იქნება. ჩემი დაცვის ქვეშ მყოფი 5 ივლისს იქ იმყოფებოდა. ის თავს დამნაშავედ წარდგენილ ბრალდებაში არ ცნობს”,- განაცხადა მჟავანაძემ.

ცნობისთვის, შინაგან საქმეთა სამინისტროს თანამშრომლებმა „თბილისი პრაიდის“ საწინააღმდეგო აქციის დროს, „რუსთავი 2“-ის ოპერატორზე ძალადობის ფაქტზე ერთი პირი დააკავეს. შსს-ის ცნობით, გამოძიებით დადგინდა, რომ ბრალდებულმა 5 ივლისს, რუსთაველის გამზირზე „თბილისი პრაიდის“ საწინააღმდეგოდ გამართული აქციის მიმდინარეობის დროს, „ცისფერი გალერეას” მიმდებარედ ტელეკომპანია „რუსთავი 2” -ის ოპერატორს სამსახურებრივი მოვალეობის შესრულებისას ფიზიკური და სიტყვიერი შეურაცხყოფა მიაყენა.

რაც შეეხება ბრალდებულს „ტვ პირველის” ოპერატორის მიმართ განხორციელებული ძალადობის საქმეში, სამართლადამცველებმა ასევე გუშინ დააკავეს. გამოძიებით დადგინდა, რომ ბრალდებულმა ი.წ.-მ 5 ივლისს, რუსთაველის გამზირზე, „თბილისი პრაიდის“ საწინააღმდეგოდ გამართული აქციის მიმდინარეობის დროს, რევაზ თაბუკაშვილისა და გიორგი ჭანტურიას ქუჩების კვეთაზე, „ტვ პირველის“ ოპერატორს სამსახურებრივი მოვალეობის შესრულებისას ფიზიკური და სიტყვიერი შეურაცხყოფა მიაყენა.