თბილისში, ანჯაფარიძის ქუჩაზე ნიკა კვარაცხელიას განზრახ ჯგუფურად მკვლელობის საქმეზე ძებნაში მყოფი პირები 21 წლის აკო ჭელიძე და 22 წლის გიორგი კავილაძე არიან. ამის შესახებ ინფორმაციას AMBEBI.GE ავრცელებს. მათივე ინფორმაციით, აკო ჭელიძე გარდაბნის საკრებულოს ყოფილი წევრის, ჯეირან ჭელიძის შვილია.

ცნობისთვის, ანჯაფარიძის ქუჩაზე, ნიკა კვარაცხელიას განზრახ მკვლელობის საქმე შინაგან საქმეთა სამინისტრომ გახსნილად გამოაცხადა. აკო ჭელიძის და გიორგი კავილაძის სამძებრო სამუშაოები მიმდინარეობს.

როგორც შსს-ს მიერ გავრცელებულ ინფორმაციაშია აღნიშნული, ნიკა კვარაცხელიას მიმართ 10-ზე მეტი გასროლა განხორციელდა, სავარაუდო დამნაშავემ კი ტერიტორია თანამზრახველთან ერთად ნაქირავები მანქანით დატოვა. პროკურატურის ინფორმაციით, ვერაზე, ნიკა კვარაცხელიას განზრახ მკვლელობის საქმეზე, ორი პირის მიმართ ბრალის წარდგენის თაობაზე დადგენილება გამოტანილია.

შეგახსენებთ, რომ ნიკა კვარაცხელია ტექნოლოგიების სფეროში საქმიანობდა, ის პლატფორმა Feedc-ის დამფუძნებელია.